پی ایس 115کے ضمنی الیکشن کے سلسلے میں ایم کیوایم کے زیراہتمام لائینز ایریا ٹاؤن کی یوسی 11میں پتنگ میلہ اور سوسائٹی ٹاؤن کی یوسی 7اور 8میں انتخابی ریلیوں کا انعقاد

کراچی ۔۔۔2، اپریل 2016ء 

پی ایس 115کی نشست پر ہونے والے ضمنی الیکشن کے سلسلے میں متحدہ قومی موومنٹ کے زیرا ہتمام لائینز ایریا ٹاؤن کی یوسی 11میں پتنگ میلہ منعقد ہوا جبکہ سوسائٹی ٹاؤن کی یوسی 7اور 8میں انتخابی ریلیاں نکالی گئیں ۔ پتنگ میلہ اور انتخابی ریلیوں میں نامزد حق پرست امیدوار برائے پی ایس 115فیصل رفیق ، حق پرست رکن قومی اسمبلی ڈاکٹر فوزیہ حمید ، حق پرست ارکان سندھ اسمبلی محمود عبد الرزاق ، وقار شاہ ، نامزد میئر کراچی وسیم اختر نے بھی شرکت کی ۔ لائینز ایرٹاؤن کی یوسی 11میں منعقد کئے گئے پتنگ میلہ میں نوجوانوں، بزرگوں ، خواتین اور بچوں کی بڑی تعداد شریک ہوئی جنہوں نے ایم کیوایم کے سہ رنگی رنگ پر مشتمل پتنگیں اڑائیں اور قائد تحریک جناب الطاف حسین اور ایم کیوایم کے حق میں فلک شگاف نعرے لگائے ۔ اسی طرح انتخابی مہم کے سلسلے میں سوسائٹی ٹاؤن کی یوسی 7اور 8سے نکالی گئی انتخابی ریلیوں کے شرکاء نے اپنے ہاتھوں میں قائد تحریک جناب الطا ف حسین کی تصاویر اورا یم کیوایم کے پرچم اٹھا رکھے تھے ۔ ریلی لائینز ایریا ٹاؤن اور سوسائٹی ٹاؤن کی مختلف شاہراہوں ، سڑکوں ، محلوں اور علاقوں سے گزرتی ہوئی واپس ٹاؤن آفسوں پرآکر اختتام پذیر ہوئی ۔ اس موقع پر ریلی کے شرکاء سے خطاب کرتے ہوئے نامزد حق پرست امیدوار فیصل رفیق نے کہاکہ قائد تحریک جناب الطاف حسین کے خلاف بے ہودہ زبان اور بد کلامی برداشت نہیں کی جائے گی اور جناب الطاف حسین کی شخصیت کارکنان و عوام کیلئے بہت زیادہ احترام کی ہے ۔ انہوں نے کہا کہ نام نہاد ضمیر فروشوں کا ٹولہ اپنی عیاری ، مکاری اور چور بازاری سے عوام میں جانا پہچانا جارہا ہے اور اس ٹولہ کے سرغنہ اور کارندوں نے اگر جناب الطاف حسین کے خلاف اپنی زبانوں کو لگام نہ دی وہ صبر کی اپیلیوں کے باوجود عوامی ردعمل سے ہرگز نہیں بچ سکتا ہے ۔ انہوں نے کہاکہ میر پورخاص میں نام نہاد ڈلہ کی عوامی طاقت کا اندازہ ہوچکا ہے اور ان کے تمام دعوے ریت کی دیوار ثابت ہوئے ہیں ۔ انہوں نے کہا کہ نام نہاد ٹولہ کے سرغنہ اور کارندے قائد تحریک جناب الطاف حسین کے خلاف بدکلامی کرکے اپنی چوربازاری پرپردہ ہرگز نہیں ڈال سکتے ہیں اور اسٹیبلشمنٹ کے بعض عناصر کے اشارے پر اپنے اشتعال انگیز منصوبے میں کامیاب ہوسکتے ہیں ۔ فیصل رفیق نے ریلیوں کے شرکاء سے اپیل کی کہ وہ 7، اپریل 2016ء کو پتنگ کے انتخابی نشان پر اپنی مہر لگائیں اور جناب الطاف حسین کے خلاف بدکلامی کرنے والے ٹولہ کو اسٹیبلشمنٹ کے خمار سے باہر نکال دیں ۔