پنجاب میں کالعدم تنظیموں کے دہشت گردوں کے خلاف فوج کے بھرپورایکشن کافیصلہ قابل تحسین ہے۔الطاف حسین

لندن ۔۔۔ 28 مارچ 2016ء

متحدہ قومی موومنٹ کے قائدجناب الطاف حسین نے فوج کی جانب سے پنجاب میں دہشت گردوں کے خلاف ایکشن کے فیصلے کی بھرپور حمایت کی ہے اوراسے قابل تحسین اقدام قراردیاہے۔اپنے ایک بیان میں انہوں نے کہاکہ ایم کیوایم ہمیشہ سے یہ کہتی رہی ہے کہ جب تک مساجد، امام بارگاہوں، مزارات ،مسلح افواج کے مراکز ،بازاروں میں خودکش حملے اوربموں کے دھماکے کرنے والے مذہبی انتہاپسند دہشت گردوں اورکے خلاف بھرپورکارروائی نہیں کی جائے گی اس وقت تک دہشت گردی کی روک تھام نہیں ہوسکے گی۔جناب الطاف حسین نے کہا کہ گزشتہ روزلاہورمیں ہونے والے خودکش دھماکے اوربڑے پیمانے پر شہریوں کے جانی نقصان کے بعد مسلح افواج نے پنجاب میں کالعدم تنظیموں کے دہشت گردوں کے خلاف بھرپورایکشن کافیصلہ کیاہے وہ قابل تحسین ہے اور ہم اس ایکشن کی بھرپورغیرمشروط حمایت کرتے ہیں۔ جناب الطاف حسین نے کہاکہ ضرورت اس بات کی ہے کہ نیشنل ایکشن پلان پر اس کی روح کے مطابق عمل کرتے ہوئے مذہبی انتہاپسند دہشت گردوں کے خلاف بلاامتیاز کارروائی کی جائے ۔