حق پرست ارکان سندھ اسمبلی کاٹی بی کنٹرول پروگرام غیر فعال ہونے اور دواؤں کی قلت پر اظہار مذمت

کراچی۔۔25 مارچ 2016 ء 

متحدہ قومی موومنٹ کے حق پرست ارکان سندھ اسمبلی نے ٹی بی کنٹرول پروگرام غیر فعال ہونے اور ٹی بی کی دواؤں کی قلت کی شدید مذمت کی ہے اور کہا ہے کہ پاکستان سمیت دنیا بھر میں ٹی بی کا عالمی دن منایا گیا اور اس کے برعکس پاکستان میں ٹی بی پروگرام کا غیر فعال ہونا اور ٹی بی کی دواؤں کی قلت انتہائی تشویش ناک ہے ۔ اپنے مشترکہ بیان میں انہوں نے کہاکہ ٹی بی کے عالمی دن کے حوالے سے دنیا بھر میں اس مرض کے خاتمے کا عزم کیا جاتا ہے لیکن پاکستان میں ٹی بی کے عالمی دن کے موقع پر بچوں کی ٹی بی کی دوائیں ناپید ہیں جبکہ محکمہ صحت کے ماتحت چلنے والے انسداد ٹی بی کنٹرول پروگرام بھی غیر فعال ہے۔انہوں نے کہا کہ ٹی بی کا مرض دنیا کے 22 ممالک میں موجود ہے جن میں پاکستا ن پانچویں نمبر پر ہے اور ہمارے ہاں ٹی بی کے مرض پر قابو پانے کیلئے جدت اپنانے کے بجائے یہ مرض بڑھ رہا ہے جس کی جتنی بھی مذمت کی جائے کم ہے ۔انہوں نے کہا کہ ٹی بی کا مرض یک سے دوسرے بچے اور افراد کو متاثر کر سکتا ہے ہر سال پاکستان میں 5 لاکھ کے قریب لوگ اس مرض میں مبتلا ہوتے ہیں اس صوتحال میں بچوں میں ٹی بی کی دواؤں کی فراہمی کو ہر صورت یقینی بنانا حکومت اور متعلقہ اداروں کی بنیادی ذمہ داری ہے ۔ ارکان سندھ اسمبلی نے وزیراعظم نواز شریف اور وزیراعلیٰ سندھ سید قائم علی شاہ سے مطالبہ کیا کہ ٹی بی کی دوائیں نا پید ہونے اور انسداد ٹی بی کنٹرول پروگرام غیر فعال ہونے کا سنجیدگی سے نوٹس لیاجائے اور ٹی بی جیسی بیماریوں سے نمنٹنے کے لئے پبلک ہیلتھ شعبہ فی الفور بحال کیا جائے ۔