پشاور صدر بازار سنہری مسجد کے قریب سول سیکریٹریٹ کی بس میں بم دھماکہ پر جناب الطاف حسین کااظہار مذمت

لندن ۔۔۔ 16؍ مارچ 2016ء

متحدہ قومی موومنٹ کے قائد جناب الطاف حسین نے پشاور صدر بازار سنہری مسجد کے قریب سول سیکر یٹریٹ کی بس میں بم دھماکہ کی سخت ترین الفاظ میں مذمت کی ہے اور دھماکہ میں متعدد سرکاری ملازمین کے شہید و زخمی ہونے پر گہرے دکھ اور افسوس کااظہار کیا ہے ۔ ایک بیان میں جناب الطاف حسین نے کہاکہ اس سے قبل سفاک دہشت گرد چارسدہ کی تحصیل شبقدر میں سیشن کورٹ کے قریب بھی خود کش دھماکہ کرکے کئی معصوم و بے گناہ انسانوں کی جانوں سے کھیل چکے ہیں اور پشاور میں سول سیکرٹریٹ کی بس میں بم دھماکہ کی کاروائی نہ صرف قابل مذمت ہے بلکہ ملک کو عدم استحکام سے دوچار کرنے کی سازشوں کا تسلسل ہے ۔انہوں نے بم دھماکہ میں شہید ہونیو الے سرکاری ملازمین کے تمام سوگوار لواحقین سے دلی تعزیت وہمدردی کااظہار کرتے ہوئے انہیں صبر کی تلقین کی اور دعا کی کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے۔ انہوں نے زخمیوں کی جلد ومکمل صحت یابی کیلئے دعا بھی کی ۔ جناب الطاف حسین نے وزیراعظم نواز شریف ، چیف آف آرمی اسٹاف جنرل راحیل شریف اور وزیراعلیٰ خیبرپختونخوا پرویز خٹک سے مطالبہ کیا کہ پشاور میں سول سیکریٹریٹ کے ملازمین کی بس میں بم دھماکہ میں ملوث دہشت گردوں اور ان کے سرپرستوں کو فی الفور گرفتارکیاجائے اور عوام کی جان و مال کے تحفظ کیلئے آپریشن ضرب عضب کے تحت جیٹ بلیک دہشت گردوں اور ان کے سہولت کاروں کے خلاف مزید مثبت اور ٹھوس اقدامات کے تحت عملی کاروائی کی جائے ۔