مظفر آباد اورمیر پور پریس کلب کے باہر ایم کیوایم آزاد کشمیر کے تحت جناب الطاف حسین سے اظہار یکجہتی کیلئے ریلیاں نکالی گئیں

جناب الطاف حسین پر الزامات عائد کرنے والے کشمیری عوام کے جذبات سے کھیل رہے ہیں ، شرکاء کے جذبات

مظفر آباد۔۔۔4، مارچ2016ء

ایم کیوایم آزاد کشمیر کے زیرا ہتمام مظفر آباد اور میر پور پریس کلب کے باہر جناب الطاف حسین سے اظہار یکجہتی کیلئے ریلیاں نکالی گئیں جن میں عوام و کارکنان نے کثیر تعداد میں شرکت کی ۔ ریلیوں کی سربراہی آزاد کشمیر قانون سازاسمبلی میں ایم کیوایم کے پارلیمانی لیڈر طاہر کھوکھر ، ایم کیوایم آزاد کشمیر کے ذمہ داران مشکور بلال بٹ اور عزت علی نے کی ۔ جناب الطاف حسین سے اظہار یکجہتی کیلئے نکالی جانے والی ریلیوں کے شرکاء اپنے ہاتھوں میں اظہار یکجہتی پر مشتمل پلے کارڈ اور بینرز اٹھا رکھے تھے جن پر جناب الطاف حسین کیلئے دعائیہ اشعار اور کلمات تحریر تھے ۔ ریلیوں نے شرکاء نے ہاتھوں میں ایم کیوایم کے پرچم بھی اٹھا رکھے تھے اور فلک شگاف انداز میں جناب الطاف حسین کے حق میں نعرے لگا رہے تھے ۔ اظہار یکجہتی کی ریلیوں کے شرکاء نے اپنے جذبات کااظہار کرتے ہوئے کہاکہ آزاد کشمیر کے عوام جناب الطاف حسین کیساتھ ہیں ، آزاد کشمیر میں آنے والے زلزلہ میں جناب الطا ف حسین نے جو کردار ادا کیا اور اپنی امداد ٹیموں کو آزاد کشمیر بھیجا ان کا یہ احسان کشمیری عوام کبھی نہیں بھول سکتی ۔ انہوں نے کہا کہ جناب الطاف حسین پر الزامات عائد کرنے والے کشمیری عوام کے جذبات سے کھیل رہے ہیں جس کی جتنی بھی مذمت کی جائے کم ہے ۔ ان کا کہنا تھا کہ قائد تحریک جناب الطاف حسین مظلوموں کے مسیحا اور نجات دہندہ ہیں اور ان کے دامن پر کیچڑ اچھالنے والے ذلیل و رسوا ہوں گے ۔ ان کا کہنا تھا کہ ہم جناب الطاف حسین پر اندھا اعتماد کرتے ہیں اور ان کی عملی جدوجہد کو قدر کی نگاہ سے دیکھتے ہیں اور ہمیں کامل یقین ہے کہ جناب الطاف حسین کی قیادت میں ہی اس ملک کے مظلوم عوام کو حقوق میسر آئینگے ۔