متحدہ قومی موومنٹ کی رابطہ کمیٹی لندن اور پاکستان کے ارکا ن کا مشترکہ ہنگامی اجلاس اجلاس میں ملک کی مجموعی سیاسی صورتحال، ماحولیاتی تبدیلیوں، پاکستان میں قدرتی آفات کے تناظر میںقائد تحریک الطاف حسین کی حالیہ اپیل پر غوروخوض کیا گیا

کراچی۔۔۔17،فروری 2016ء 

متحدہ قومی موومنٹ کی رابطہ کمیٹی لندن اور پاکستان کے ارکا ن کا مشترکہ ہنگامی اجلاس ہوا ۔ جس میں ملک کی مجموعی سیاسی صورتحال، عالمی سطح پر ہونے والی ماحولیاتی تبدیلیوں، پاکستان میں زلزلے ، سیلاب اور دیگرقدرتی آفات کے تناظر میں قائد تحریک جناب الطاف حسین کی محب وطن پاکستانیوں کے نام حالیہ دردمندانہ اپیل پر غوروخوض کیا گیا۔اجلاس میں کہاگیا کہ قائد تحریک جناب الطاف حسین نے اپنی 38 سالہ جدوجہدکے دوران جو جو پیش گوئیاں کیں وہ ایک ایک کرکے سچ ثابت ہوتی رہی ہیں ۔ ایم کیوایم کے خلاف کی جانے والی سازشوں کے علاوہ قائد تحریک جناب الطاف حسین نے کراچی میں طالبائزیشن اور پھر داعش کے خطرے سے ملک بھرکے عوام کو پیشگی آگاہ کردیا تھا لیکن ارباب اقتدار واختیار اور میڈیا کے نمائندوں کی جانب سے جناب الطاف حسین کے خدشات پر سنجیدگی کا مظاہرہ کرنے کے بجائے ان کا مذاق اڑایا گیا ۔ اجلاس میں مزید کہاگیا کہ آج پاکستان کے ہر حصے میں طالبانائزیشن ، داعش اور کالعدم جہادی تنظیموں کی موجودگی اس بات کا کھلا ثبوت ہے کہ قائد تحریک جناب الطاف حسین کے خدشات درست تھے لیکن ایم کیوایم دشمنی میں جناب الطاف حسین کی باتوں کو دانستہ نظرانداز کیا گیا جس کا نقصان ملک وقوم کو اٹھانا پڑا۔اجلاس میں کہاگیاکہ قائد تحریک جناب الطاف حسین نے اپنے حالیہ بیان میں جن خدشات کا اظہار کیا ہے ، اس پر رابطہ کمیٹی کے مشترکہ اور طویل اجلاس متفقہ طورپر طے کیاگیا کہ ملک وقوم کیلئے آئندہ 15 روز انتہائی اہمیت کے حامل ہیں لہٰذا ایم کیوایم کے تمام ذمہ داران اور کارکنان پر لازم ہے کہ وہ ملک بھر کے عوام میں قائد تحریک جناب الطاف حسین کا پیغام پہنچانے کیلئے اپنا بھرپورکردار ادا کریں ۔ رابطہ کمیٹی نے ملک بھر کے عوام سے اپیل کی کہ وہ آئندہ 15 روز اپنی آمدورفت میں انتہائی احتیاط سے کام لیں ، 15 روز کیلئے اپنی ضروری ادویات اور روزمرہ استعما ل کی اشیاء کا ذخیرہ کرلیں ۔