ملک کی دو بڑی سیاسی جماعتیں کشمیر جیسی خوبصورت اور پرامن وادی کو معصوم کشمیریوں کے خون سے رنگ رہی ہیں، ڈاکٹر فاروق ستار
تشدد کبھی بھی آزاد کشمیر کی روایات کا حصہ نہیں آزاد کشمیر کی پرامن سیاسی روایات اور پرامن ماحول کو تباہ کرنے کی اجازت نہیں دی جائے گی، فاروق ستار
کراچی ۔۔۔ 14؍ فروری 2016ء
متحدہ قومی موومنٹ کے سینئر ڈپٹی کنونیر ڈاکٹر فاروق ستار نے آزاد کشمیر نکیال سیکٹر میں فائرنگ کے واقعے کی پرزور الفاظ میں مذمت کرتے ہوئے کہا ہے کہ اقتدار کی جنگ اور ہوس میں ملک کی دو بڑی سیاسی جماعتیں کشمیر جیسی خوبصورت اور پرامن وادی کو معصوم کشمیریوں کے خون سے رنگ رہی ہیں۔ انہوں نے کہا کہ اس واقعے سے کشمیر کاز کو کتنا نقصان پہنچا اور عالمی سطح پر ملک کی کتنی بدنامی ہوئی شاید اس کا اندازہ ان نا عاقبت اندیشوں کو نہیں ہے۔ انہوں نے کہا کہ مفاہمت کی سیاست کی ہنڈیا بیچ چوراہے میں پھوٹ گئی ہے۔ انہوں نے کہا کہ تشدد کا عنصر کبھی بھی آزاد کشمیر کی روایات کا حصہ نہیں تھا یہاں کی پرامن سیاسی روایات اور پرامن ماحول کو تباہ کرنے کی اجازت نہیں دی جائے گی۔ اس موقع پر انہوں نے وزیر اعظم پاکستان سمیت تمام متعلقہ حکام سے مطالبہ کیا کہ مذکورہ واقعے کی انکوائری کے لئے اعلیٰ سطحی و قلیل مدتی کمیشن بنایا جائے تاکہ ذمہ داروں کا تعین کیا جاسکے۔