جناب الطاف حسین نے پاک ا فواج کو لاکھوں کارکنان سے سیلوٹ کروایااور خراج تحسین پیش کیا ، انچارج سندھ تنظیمی کمیٹی

کراچی ۔۔۔یکم ؍ فروری2016ء

متحد ہ قومی موومنٹ کی سندھ تنظیمی کمیٹی کے انچارج عمر قریشی و اراکین نے میڈیاپر جناب الطاف حسین کی تقاریر و تصاویر کی نشرو اشاعت پر عائد پابندی کو بنیادی انسانی حقوق کے خلاف قرار دیتے ہوئے وفاقی حکومت سے اپیل کی ہے کہ وہ جناب الطاف حسین پر عائد پابندی کے خاتمے کیلئے اپنا کردار اداکریں ۔ایک مشترکہ بیان میں انہوں نے کہاکہ ایم کیوا یم پاکستان کی تیسری سب سے بڑی پارلیمانی جماعت ہے جوگزشتہ تین دہائیوں سے زائد عرصے سے سندھ کے شہری علاقوں سمیت ملک بھر کے مظلومو ں اور محروموں کی نمائندگی کر تی آرہی ہے،جناب الطاف حسین پاکستان کے واحد سیاسی رہنماہیں جو ناصرف ملک کی بقاء و سلامتی کیلئے ہر لمحہ فکر مند رہتے ہیں بلکہ ملک و قوم کو درپیش خطرات کیخلاف سب سے پہلے آواز بلندکرتے ہیں اور قوم کو اس خطرے کے مقابلے کیلئے تیار کرتے ہیں،پیپلز پارٹی نے سندھ کے شہری علاقوں او ر دیہات کے مظلوم سندھیوں کو اپنی سیاست کی بھینٹ چرھا دیالیکن قائد تحریک نے ان سندھی بھائیوں ،بہنوں اور بچوں کے حقوق کیلئے ہر فورم پر آواز بلندکی اورمظلوم سندھیوں کے ساتھ زیادتیوں کے خاتمے کی جدوجہد کی ہے۔انہوں نے کہاکہ جناب الطاف حسین نے پاک فوج کے جوانوں کو لاکھوں کارکنان کے ذریعے سیلوٹ کروایااور خود بھی فوج کو خراج تحسین پیش کیا لیکن ملک کے ناعاقبت اندیش حکمرانوں اور 2فیصد جاگیردار، وڈیرے اور سرمایہ دار طبقے کے لوگوں نے ملک کی مسلح افواج کیلئے جناب الطاف حسین کے جذبات کو سراہنے کے بجائے انکی آواز اور تصویر پر پابندی عائد کردی۔سندھ تنظیمی کمیٹی کے انچارج و اراکین نے کہاکہ ملک و قوم کی فلاح اور بہبود کیلئے کوشاں سیاستدان او ر دیگر شعبہ ہائے زندگی سے تعلق رکھنے والے افراد جناب الطاف حسین پر عائد غیر جمہوری پابندی کے خاتمے کیلئے ہر فورم پرآواز بلند کریں اور ملک کو 2فیصد مراعات یافتہ طبقے سے چھٹکارا دلانے میں اپنا اہم کردار ادا کریں۔