گارڈن کے علاقے سے ایم کیوایم کے کارکن منہاج قاضی کی بلاجواز گرفتاری پر رابطہ کمیٹی کا اظہار مذمت
منہاج قاضی کے بارے میں رینجرز اہلکاروں کی جانب سے ان کے اہلخانہ کو کچھ نہیں بتایا جارہا ہے، رابطہ کمیٹی
آئین و قانون کا تقاضہ ہے کہ منہاج قاضی کی گرفتاری ظاہر کی جائے اور انہیں وہ تمام آئینی و قانونی سہولیات فراہم کی جائیں جو ہر شہری کا بنیادی حق ہے، رابطہ کمیٹی ایم کیوایم
کراچی ۔۔۔29، جنوری 2016ء
متحدہ قومی موومنٹ کی رابطہ کمیٹی نے رینجرز اہلکاروں کے ہاتھوں گارڈن کے علاقے سے ایم کیوایم کے کارکن منہاج قاضی کی گرفتاری کی مذمت کی ہے ۔ ایک بیان میں رابطہ کمیٹی نے کہاکہ آج علی الصبح رینجرز اہلکاروں نے منہاج قاضی کی رہائشگاہ پر غیر قانونی چھاپہ مارا اور انہیں گرفتار کرکے اپنے ہمراہ لے گئے۔ رابطہ کمیٹی نے کہاکہ گرفتاری کے بعد سے منہاج قاضی کے بارے میں رینجرز اہلکاروں کی جانب سے ایم کیوایم کے ذمہ داران اور ان کے اہل خانہ کوکچھ نہیں بتایا جارہا ہے کہ انہیں کہاں رکھا گیا ہے جس کے باعث وہ شدید ذہنی کرب و اذیت میں مبتلا ہیں۔ رابطہ کمیٹی نے کہاکہ حراست کے بعد ہر شخص کو آئین وقانون اپنے دفاع کا حق دیتا ہے اور آئین و قانون کا تقاضہ ہے کہ منہاج قاضی کی گرفتاری ظاہر کی جائے اور انہیں وہ تمام آئینی و قانونی سہولیات فراہم کی جائیں جو ہر شہری کا بنیادی حق ہے ۔ رابطہ کمیٹی نے وزیراعظم پاکستان نواز شریف ، وزیراعلیٰ سندھ سید قائم علی شاہ اور ڈی جی رینجرز میجر جنرل بلال اکبر سے مطالبہ کیا کہ منہاج قاضی کی بلاجواز گرفتاری کا سختی سے نوٹس لیاجائے اورحراست کے دوران ان کی زندگی کو لاحق خطرات کے خدشات کودور کرکے اہل خانہ کو مطمئن کیاجائے ۔