وزیر اعظم نوا ز شریف اور آرمی چیف جنرل راحیل شریف کا سعودی عرب اور ایران کے دورے کا اعلان مثبت قدم ہے۔ الطاف حسین

لندن۔۔ 16جنوری 2016ء

متحدہ قومی موومنٹ کے قائد جناب الطاف حسین نے وزیر اعظم نوا ز شریف اور آرمی چیف جنرل راحیل شریف کی جانب سے سعودی عرب اور ایران میں ثالثی کرانے کیلئے دونوں ممالک کے دورے کے اعلان کا زبردست خیر مقدم کیا ہے اور ایک مثبت قدم قرار دیا ہے ۔ اپنے ایک بیان میں جناب الطاف حسین نے کہا کہ سعودی عرب اور ایران تنازعہ کے آغاز سے ہی ایم کیوایم کا یہ اصولی مؤقف رہا ہے کہ پاکستان برادر اسلامی ممالک کے مابین اس تناز عہ میں فریق بننے اور کسی ایک ملک کا ساتھ دینے کے بجائے غیرجانبداررہے اور مصالحت کا ر کا کردار ادا کرے ۔ انہوں نے کہا کہ ماضی میں حکمرانوں نے دوسروں کے تنازعات میں پاکستان کو الجھاکر ملکی سلامتی ،استحکام ،سیکورٹی اور غیر جانبداری کو ناقابل تلافی نقصان پہنچایااور وقتی مفادات کے حصول کیلئے ایسے فیصلے کئے جن کا خمیازہ پاکستان بالخصوص اسکے عوام آج تک دہشت گردی کا نشانہ بن کر بھگت رہے ہیں ۔جناب الطاف حسین نے کہا کہ مجھے خوشی ہے کہ وزیر اعظم اور آرمی چیف نے قوم کی آواز پر لبیک کہتے ہوئے سعودی عرب اور ایران کے مابین تازہ ترین تنازعہ میں فریق بننے کے بجائے مصالحت کار کا کردار ادا کرنے کا فیصلہ کیا ہے یہ فیصلہ نہ صرف عوامی خواہشات کے مطابق ہے بلکہ پاکستان کے عین مفاد میں ہے ۔

جناب الطاف حسین نے کہاکہ مجھے امیدہے اور میں خداکے حضوردعاگوہوں کہ وہ وزیراعظم اورآرمی چیف کے سعودی عرب اورایران کے اس دورے کو کامیاب بنائے ، دونوں ممالک کے مابین کشیدگی کاخاتمہ ہو، برادرانہ تعلقات قائم ہوں اورمشرق وسطیٰ میں پوری دنیا میں دیرپا امن واستحکام قائم ہو۔