ملک کے مختلف شہروں میں داعش کی کاروائیاں پوری قوم کیلئے لمحہ ء فکریہ کی حیثیت رکھتی ہیں، ایم کیوا یم ٹنڈوالہ یار زون
جناب الطاف حسین نے ہمیشہ ملکی سلامتی کو مقدم رکھا ہے اور ملک کو درپیش خطرات کو محسوس کرتے ہوئے حکمرانوں کو قبل ازوقت آنے والے خطرات سے آگاہ کیا ہے، ایم کیوا یم ٹنڈوالہ یار کے زونل انچارج و اراکین کا بیان
ٹنڈو الہ یار۔۔۔۔۔15جنوری2016
متحدہ قومی موومنٹ ٹنڈو الہ یار زون کے قائم مقام زونل انچارج عبدالرحمان ایڈوکیٹ و اراکین زونل کمیٹی نے کہا ہے کہ ملک کے مختلف شہروں میں داعش کی کاروائیاں پوری قوم کیلئے لمحہ ء فکریہ کی حیثیت رکھتی ہیں۔ اپنے ایک مشترکہ بیان میں انہوں نے کہا کہ جناب الطاف حسین وہ واحد سیاسی رہنما ہیں جنہوں نے پاکستان کی جانب داعش کے بڑھتے ہوئے خطرات کو بروقت محسوس کرتے ہوئے بذریعہ پریس کانفرنس قوم کو آگاہ کیا مگر مملکت کے امور سے بے خبر وزراء نے جناب الطاف حسین کے خدشات کو سنجیدگی سے لینے کے بجائے پاکستان میں داعش کے وجود سے سراسر انکار اور جناب الطاف حسین کے بیانات کو الزامات کا نشانہ بنانا شروع کر دیا۔ انہوں نے کہا کہ قائد تحریک الطاف حسین نے ہمیشہ ملکی سلامتی کو مقدم رکھا ہے اور ملک کو درپیش خطرات کو محسوس کرتے ہوئے حکمرانوں کو قبل ازوقت آنے والے خطرات سے آگاہ کیا ہے مگر یہ اس ملک و قوم کی بدقسمتی ہے کہ حکمران طبقے نے جناب الطاف حسین کی جانب سے بیان کردہ حقائق کو کبھی سنجیدگی سے نہیں لیا اور حکمران طبقے کے اس غیر سنجیدہ طرز عمل کے باعث ملک و قوم کو بیشتر قیمتی جانوں کا نقصان اٹھانا پڑا۔