مذہبی انتہا پسندی کے خلاف کاروائی میں حکومتی ہچکچاہٹ کی وجہ سے دہشت گردی کا عفریت ملک بھر میں پھیل چکا ہے، ایم کیوا یم میر پور خاص

میرپورخاص۔۔۔۔15جنوری2016ء

متحدہ قومی موومنٹ میر پور خاص کے زونل انچارج مجیب الحق و اراکین زونل کمیٹی نے کہاہے کہ مذہبی انتہا پسندی کے خلاف کاروائی میں حکومتی ہچکچاہٹ کی وجہ سے دہشت گردی کا عفریت ملک بھر میں پھیل چکا ہے۔انہوں نے کہاکہ جناب الطاف حسین ہمیشہ قوم کو مستقبل کے خطرات سے پیشگی آگاہ کرتے رہے لیکن خود کو عقل کل سمجھنے والے سیاسی و مذہبی رہنماؤں اور حکومت وقت نے داعش کی ملک میں موجودگی سے انکار کرکے ملک و قوم کو دہشت گردوں اور مذہبی انتہا پسندوں کے رحم و کرم پر چھوڑ دیاہے، آج داعش اور انکے حامیوں نے ملک بھر میں اپنی جڑیں مضبوط کرلی ہیں ۔انہوں نے کہا کہ داعش کے وجود کا اعلانیہ اقرار کرکے اسکے وجود سے کھلے عام انکار کرنے والوں کو شرم سے ڈوب مرنا چاہئے۔اسلام آباد میں نجی نیوز چینل اے آر وائی کے دفتر پر بم حملے کی دہشت گرد تنظیم داعش کی جانب سے ذمہ داری قبول کرنے کے بعد اب اس حقیقت سے کوئی انکار نہیں کرسکتا کہ ملک کے دارالخلافہ میں مذہبی انتہاپسندوں نے اپنی جڑیں مضبوط کرلی ہیں ۔انہوں نے ارباب اختیار سے مطالبہ کیا کہ داعش کے عفریت کو کچلنے کے لئے ٹھوس اقدامات اٹھائے جائیں۔