پاکستان میں داعش کے وجودسے انکارکرنے والے سیاستدانوں اور متعصب صحافیوں کواپنا محاسبہ کرنا چاہئے ،ایم کیوا یم سینٹرل پنجاب

لاہور۔۔۔۔۔15 جنوری2016ء

متحدہ قومی موومنٹ سینٹرل پنجاب کی قائم مقام کمیٹی کے اراکین نے کہا ہے کہ ملک کے مختلف شہروں میں داعش کی کھلے عام کارروائیوں کے بعد پاکستان میں داعش کے وجودسے انکارکرنے والے سیاستدانوں ، ارباب اقتدار اور متعصب صحافیوں کواپنا محاسبہ کرنا چاہئے ۔ایک مشترکہ بیان میں انہوں نے کہاکہ جناب الطاف حسین ملک کے واحد رہنما ہیں جنہوں نے قوم کو ہمیشہ حقائق اور آنیوالے خطرات سے پیشگی آگاہ کیاہے ،جناب الطاف حسین نے ملک میں طالبانائریشن کے خطرے سے سب سے پہلے آگاہ کیا تھا لیکن اس وقت کی حکومت کے وزراء اورسیاسی ومذہبی رہنماؤں نے نہ صرف انکے بیانات کی نفی کی بلکہ حقیقت سے آنکھیں چراتے ہوئے انکا مذاق تک اُڑایا۔انہوں نے کہاکہ داعش کے لوگ دہشت گردی کے لئے بھرتیاں کررہے ہیں اورلوگوں کواپنے ساتھ ملارہے ہیں لیکن ان کے خلاف کارروائی نہیں کی جارہی، گزشتہ دنوں اسلام آباد میں نجی نیوز چینل کے دفتر پر حملہ سب کی آنکھیں کھولنے کیلئے کافی ہے۔انہوں نے کہاکہ حکمرانوں کی بے حسی کے سبب داعش اور اسکے حامی شدت پسندوں کی جڑیں ملک بھر میں اور بالخصوص پنجاب کے مختلف علاقوں میں مضبوط ہو رہی ہیں۔انہوں نے وزیر اعظم پاکستان ، وفاقی وزیر داخلہ چوہدری نثار علی خان سے مطالبہ کیا کہ وہ ملک میں داعش کی بڑھتی ہوئی کارروائیوں کو سنجیدگی سے لیں اور اسکے حامیوں کے خلاف ملک بھر بالخصوص پنجاب میں بھر پور کارروائی کریں قبل اسکے کہ عفریت ہمارے گھروں کو جلا کر راکھ کردے۔