ایم کیوایم کے قائدالطاف حسین کا اے آروائی اسلام آبادکے دفترپرفون ، نیوزایڈیٹررضوان عالم سے گفتگو، دہشت گردی کے واقعہ پر دلی افسو س اورہمدردی کااظہار

لندن ۔۔۔ 13 جنوری 2016ء

متحدہ قومی موومنٹ کے قائدالطاف حسین نے اسلام آبادمیں اے آروائی کے دفترپرفون کرکے وہاں اے آروائی اسلام آبادکے نیوزایڈیٹررضوان عالم سے گفتگوکی اوران سے واقعہ پر دلی افسو س اورہمدردی کااظہارکیا۔ جناب الطاف حسین نے داعش کے مسلح دہشت گردوں کی جانب سے دستی بم حملے اورفائرنگ سے زخمی ہونے والے رکن کی صحتیابی کیلئے بھی دعاکی ۔ اس موقع پر گفتگوکرتے ہوئے جناب الطاف حسین نے کہاکہ میں چلاچلاکرطالبان اور داعش کے بارے میں بتاتارہالیکن حکومت کی جانب سے اس سے مسلسل انکارکیاجاتارہا۔انہوں نے کہاکہ پاکستان میں داعش کے وجود سے انکار کبوتر کی طرح آنکھ بندکرلینے اورشترمرغ کی طرح ریت میں سرچھپالینے کے مترادف ہے۔ اگرہم اس حالت انکار سے باہرنہ نکلے ،ہم نے اپناغیرذمہ دارانہ رویہ تبدیل نہ کیااور مذہبی انتہاپسندعناصر کی بلواسطہ یابلاواسطہ حمایت کرتے رہے تو داعش اوردیگرمذہبی انتہاپسند عناصرکے ہاتھوں نہ صرف ہماری جان ومال کو نقصان پہنچے گابلکہ خدانخواستہ یہ عناصر ملک کوبھی صفحہ ہستی سے مٹادیں گے۔ انہوں نے کہاکہ میں دعاکرتاہوں کہ اللہ تعالیٰ ان دہشت گردوں سے پاکستان کے چپہ چپہ کومحفوظ فرمائے۔جناب الطاف حسین نے کہاکہ میں اے آروائی کے ایک ایک کارکن سے دلی ہمدردی کااظہارکرتاہوں اوران کیلئے دعاکرتاہوں کہ اللہ تعالیٰ اے آروائی کے تمام صحافیوں، کیمرہ مینوں اورتمام اسٹاف کواپنی حفظ وامان میں رکھے۔ انہوں نے اے آروائی اسلام آباد کے نیوزایڈیٹررضوان عالم سے کہاکہ وہ اے آروائی کے مالکان سلمان اقبال اورحاجی اقبال تک بھی میرایہ پیغام پہنچادیں کہ ہم دکھ اورآزمائش کی اس گھڑی میں ان کے ساتھ ہیں اوراس موقع پر اے آروائی کے ساتھ ہرطرح کاغیرمشروط تعاون کرنے کیلئے تیار ہیں ۔