کوئٹہ کے علاقے سیٹلائٹ ٹاؤن میں بم دھماکہ پر ایم کیوایم رابطہ کمیٹی کااظہار مذمت

کراچی ۔۔۔13، جنوری 2016ء 

متحدہ قومی موومنٹ کی رابطہ کمیٹی نے کوئٹہ کے علاقے سٹیلائٹ ٹاؤن میں حفاظتی ٹیکہ جات کے مرکز کے سامنے بم دھماکہ کی سخت ترین الفاظ میں مذمت کی ہے اور بم دھماکہ کے نتیجے میں ایف سی اور پولیس اہلکاروں سمیت متعدد افراد کے ہلاک اور زخمی ہونے پر گہرے دکھ اور افسوس کااظہار کیا ہے ۔ ایک بیان میں رابطہ کمیٹی نے کہاکہ دہشت گرد بم دھماکوں اور دہشت گردی کے ذریعے اپنے مذموم مقاصد کی تکمیل کیلئے سرگرم ہیں اور معصوم و بے گناہ انسانوں کی زندگیوں سے کھیل کر کھلی درندگی کا مظاہرہ کررہے ہیں جس کی جتنی بھی مذمت کی جائے کم ہے ۔ رابطہ کمیٹی نے کہاکہ کوئٹہ میں بم دھماکہ بزدلانہ کارروائی اور دہشت گردوں کی پاکستان کے استحکام کے خلاف گھناؤنی سازشوں کا تسلسل ہے ۔رابطہ کمیٹی نے بم دھماکہ میں ہلاک ہونے والے ایف سی اورپولیس اہلکاروں سمیت دیگر افراد کے سوگوار لواحقین سے دلی تعزیت وہمدردی کااظہار کرتے ہوئے انہیں صبر کی تلقین کی اور دعا کی کہ اللہ تعالیٰ مرحومین کو جنت الفردوس میں اعلیٰ مقام عطا فرمائے ، سوگوران کو صبرجمیل عطا کرے اور زخمیوں کو جلد مکمل صحت یابی عطا فرمائے ۔ رابطہ کمیٹی نے وزیراعظم نواز شریف اور وزیراعلیٰ بلوچستان سے مطالبہ کیا کہ کوئٹہ میں حفاظتی ٹیکہ جات کے مرکز کے سامنے بم دھماکہ میں ملوث دہشت گردوں کو فی الفور گرفتار کیاجائے اور اس میں مدد و تعاون فراہم کرنے والے عناصر کے گرد گھیرا تنگ کرکے عوام کی جان و مال کا تحفظ یقینی بنایاجائے ۔