جامعہ اردو سائنس اینڈ ٹیکنالوجی کے سپریٹنڈینٹ فیصل جاوید کو نقل کی روک تھام پر تشدد کا نشانہ بنانے پر اے پی ایم ایس او کا اظہار مذمت
ایک طلبہ تنظیم کے غنڈہ عناصر کی جانب سے جامعہ اردو میں نقل کروانے کے لئے انتظامیہ کوسنگین نتائج کی دھمکیاں بھی دی جارہی ہیں
گورنر سندھ، وزیر تعلیم اور وزیر اعلیٰ سندھ اساتذہ پر تشدد میں ملوث غنڈہ عناصر کے خلاف جلد از جلد کارروائی عمل میں لاکر ان عناصر سے اساتذہ کرام اور طلبہ کا تحفظ یقینی بنائیں، اے پی ایم ایس او
کراچی ۔۔۔11جنو ری 2016ء
آل پاکستان متحدہ اسٹوڈینٹس آرگنائزیشن کے چیئرمین سرفراز احمد صدیقی اراکین کابینہ نے گزشتہ دنوں جامعہ اردو سائنس اینڈ ٹیکنالوجی کے سپریٹنڈینٹ فیصل جاویدکو نقل کی روک تھام پر ایک طلبہ تنظیم کے غنڈہ عناصر کے تشدد کی سخت ترین الفاظ میں مذمت کی ہے ۔ اپنے مشترکہ بیان میں انہوں نے کہا کہ کسی بھی مہذب معاشرے میں اساتذہ کرام کی عزت و احترام اولین فرائض میں شامل ہوتا ہے اور نقل جیسا عمل کسی بھی معاشرے کے نوجوانوں کے لئے فائدہ مند نہیں بلکہ قوموں کی تباہی کا باعث ہے ۔ انہوں نے کہا کہ غنڈہ عناصر کی جانب سے اساتذہ کرام پر تشدد کا یہ پہلا واقعہ نہیں ہے مگر انتہائی افسوس کی بات ہے کے یہ عناصر آج بھی اپنی روش پر قائم کئے ہوئے ہیں جو کہ کسی بھی با شعور معاشرے میں ایک گھنا ؤ نہ اور قابلِ مذمت فعل ہے۔ انہوں نے فیصل جاوید کی جلد صحتیابی کے لیے اللہ تعالیٰ کے حضور خصوصی دعا کی۔ اس افسوس ناک واقع پر اے پی ایم ایس او نے گورنر سندھ ،وزیر تعلیم اور وزیر اعلیٰ سندھ سے مطالبہ کیا ہے کہ وہ اساتذہ پر تشدد میں ملوث غنڈہ عناصر کے خلاف جلد از جلد کارروائی عمل میں لا کر ان عناصر سے اساتذہ کرام اور طلبہ کا تحفظ یقینی بنائیں اورجامعات اور تعلیمی اداروں کونقل مافیا و غنڈہ عناصر کی آماجگاہ بننے سے روکنے کیلئے مثبت اقدامات اٹھائیں ۔