قائد تحریک نے پیپلزپارٹی کی حکومت کے ایم کیوایم دشمن ہتھکنڈوں کو بے نقاب کرکے عوام کے جذبات کی ترجمانی کی ہے۔ ندیم نصرت

لندن ۔۔۔ 11 جنوری 2016ء

متحدہ قومی موومنٹ کی رابطہ کمیٹی کے قائم مقام کنوینرندیم نصرت نے کہاہے کہ ایم کیوایم کے بانی و قائد جناب الطاف حسین نے آج پیپلز پارٹی کی حکومت کے ایم کیوایم دشمن ہتھکنڈوں کوبے نقاب کرکے عوام کے جذبات کی ترجمانی کی ہے۔ اپنے ایک بیان میں ندیم نصرت نے کہاکہ قائدتحریک نے آج اپنے ایک تازہ ترین اوراہم بیان میں ایم کیوایم کے تمام ذمہ داروں، کارکنوں اورعوام کومخاطب کرتے ہوئے کہاہے کہ پیپلزپارٹی ایم کیوایم کے وجودکوختم کرنے کیلئے ایک مرتبہ پھرغیرآئینی وغیرقانونی اوراوچھے ہتھکنڈوں پراترآئی ہے ۔انہوں نے کہا کہ جہاں جہاں سے بلدیاتی انتخابات میں ایم کیوایم کامیاب ہوئی ہے،پیپلزپارٹی ابھی سے ان علاقوں کے عوام کومزیدپریشانیوں کی دلدل میں دھکیلنے اوران کی زندگیوں کواجیرن بنانے کے عمل پر گامزن ہوچکی ہے ۔ اس سلسلے میں پیپلزپارٹی نے تمام ایم کیوایم دشمن جماعتوں بشمول جماعت اسلامی حتیٰ کہ اسٹیبلشمنٹ کے بعض اہم افراد سے رابطے مکمل ہونے کے بعد اپنے سازشی اورگھناؤنے منصوبے کا آغاز کردیا ہے۔ ندیم نصرت نے کہاکہ قائدتحریک کاکہناہے کہ اس سازشی منصوبے کے تحت ایک طرف توروزانہ شہرکی پانی کی لا ئنوں کو نقصان پہنچایا جارہا ہے اوردوسری جانب حکومتی اہلکاروں کے زریعے کراچی،حیدرآباد،میرپورخاص ، نوابشاہ اور سکھرمیں مین ہولزکے کورغائب کرکے جگہ جگہ شہریوں کی گاڑیوں کونقصان پہنچانے، ٹریفک جام کرنے اورانہیں ذہنی وجسمانی اذیت دینے کا سلسلہ شروع کردیا گیا ہے۔ ندیم نصرت نے کہا کہ ایک طرف تویہ صورتحال جاری ہے اوراسکے ساتھ ساتھ پیپلزپارٹی کی حکومت نے ایم کیوایم کے نامزدمیئر کراچی اوردیگررہنماؤں پر روزانہ نئے نئے الزامات اور مقدمات قائم کرنے اور ان الزامات کے تحت انہیں پابندسلاسل کرنے کیلئے عدلیہ کوبھی استعمال کرناشروع کردیاہے۔ قائدتحریک نے اس سازش کے ثبوت کیلئے 10جنوری 2016ء کووزیراعلیٰ سندھ سیدقائم علی شاہ کے اس بیان کوپیش کیاہے جس میں وزیراعلیٰ سندھ نے ایم کیوایم کانام لئے بغیر یہ کہاکہ ’’ جب شروع میں آپریشن ہورہاتھاتو وہ ٹھیک تھا لیکن بعد میں اس کارخ پیپلزپارٹی کی طرف موڑکراسے مشکوک بنادیاگیا ہے‘‘ ۔ ندیم نصرت نے کہا کہ ان سازشوں کے ساتھ ساتھ پیپلزپارٹی حالیہ انتخابات کے نتیجے میں ڈسٹرکٹ ویسٹ ا ورڈسٹرکٹ ساؤتھ میں ایم کیوایم کوحاصل ہونیوالی اکثریت کو اقلیت میں بدلنے اوراسے اس کے حق سے محروم کرنے کی بھی درپردہ سازشیں کررہی ہے ۔ ندیم نصرت نے کہا کہ قائدتحریک نے تمام کارکنوں خصوصاً رابطہ کمیٹی سے کہا ہے کہ جس طرح انہوں نے ماضی میں ایم کیوایم کے خلاف کی جانے والی سازشوں کو ناکام بنایا ہے اسی طرح ان تازہ ترین سازشوں کوبھی ناکام بنانے کیلئے ذہنی وجسمانی طورپر تیارہوجائیں اورپرامن احتجاجی مظاہروں کے ذریعے پیپلزپارٹی کی حکومت کے غیر آئینی وغیرقانونی اقدامات سے دنیا کوآگاہ کریں۔