جناب الطاف حسین دنیا کی موجودہ صورتحال پر کافی فکرمند ہیں کہ کہیں کچھ ناعاقبت اندیش عوام کے درمیان ایسی فرقہ وارانہ آگ نہ بھڑکا دیں جس کی لپٹ میں پورا ملک آجائے، عبدالحسیب

کراچی ۔۔۔ 04؍ جنوری 2016ء

متحدہ قومی موومنٹ کی رابطہ کمیٹی کے رکن عبد الحسیب نے تمام مکاتب فکر سے تعلق رکھنے والے علمائے کرام کی انتہائی قلیل وقت میں ایم کیو ایم کی دعوت کو قبول کرتے ہوئے اس اجلاس میں شرکت کرنے پر ان کا تہہ دل سے شکریہ ادا کرتے ہوئے کہا کہ آپ سب پاکستان کے خیر خواں ہیں اور امت مسلمہ کے درمیان امن و سلامتی اور اتحاد چاہتے ہیں اور یہی جناب الطاف حسین چاہتے ہیں اور وہ اس وقت دنیا کی موجودہ صورتحال پر کافی فکرمند ہیں کہ کہیں کچھ ناعاقبت اندیش ملک میں فرقہ وارانہ آگ نہ بھڑکا دیں جس کی لپٹ میں پورا ملک آجائے۔ انہوں نے کہاکہ امت مسلمہ کے درمیان اتحاد پیدا کرنے کے لئے جناب الطاف حسین کی بیش بہا خدمات ہیں اور جناب الطاف حسین نے ہمیشہ یہی درس دیا ہے کہ اپنا مسلک چھوڑو نہیں اور کسی اور چھیڑو نہیں اور اسی پر عمل پیرا ہوکر امن و بھائی چارے کی فضاء قائم کی جاسکتی ہے۔ انہوں نے کہا کہ پاکستان میں فرقہ وارانہ ہم آہنگی کے قیام کیلئے متحدہ قومی موومنٹ 80ء کی دہائی سے گاہے بگاہے تمام مکاتب فکر کے علمائے کرام اور عوام الناس کو ایک پلیٹ فارم پر جمع کرتی رہی ہے تاکہ مسلم دشمن عناصر کو پیغام دیا جاسکے کہ پاکستان میں فرقہ وارانہ نفرت کی آگ بھڑکائی نہیں جاسکتی۔ انہوں نے کہا کہ قرآن پاک میں اللہ تعالیٰ نے واضح فرما دیا ہے کہ اللہ کی رسی کو مضبوطی سے تھامے رکھو گے تو تفرقہ میں نہیں پڑو گے اور جناب الطاف حسین اسی احکام الٰہی کی بنیاد پر ملک میں ایسی فرقہ وارانہ ہم آہنگی چاہتے ہیں جو دنیا کے لئے ایک مثال ثابت ہوسکے۔