بلدیاتی امیدواران کی فقید المثال کامیابی پر کراچی سمیت ملک بھر میں ایم کیوا یم کے تحت’’یومِ تشکر‘‘ منایا گیا

کراچی ۔۔۔ 08، دسمبر 2015ء

بلدیاتی انتخابات 2015ء میں متحدہ قومی موومنٹ کی شاندار کامیابی پر ایم کیو ایم کے زیر اہتمام 08، دسمبر بروز منگل کو پاکستان بھر میں ’’یومِ تشکر‘‘ منایا گیا۔ اس سلسلے میں کراچی، حیدرآباد اور میرپور خاص سمیت اندرون سندھ، صوبہ پنجاب، بلوچستان، خیبرپختونخواہ، گلگت بلتستان اور آزاد کشمیر میں موجود ایم کیو ایم کے تنظیمی دفاتر پر مقامی ذمہ داران و کارکنان نے نوافل شکرانہ ادا کئے جبکہ مرکزی اجتماع لال قلعہ گراؤنڈ، عزیز آباد میں منعقد کیا گیا جس میں ایم کیو ایم رابطہ کمیٹی کے سینئر ڈپٹی کنونیر عامر خان، ڈپٹی کنونیرز کہف الوریٰ اور سید شاہد پاشا و اراکین رابطہ کمیٹی نے سینٹرل ایگزیکٹیو کونسل کے انچارج وسیم اختر و اراکین ، تنظیمی شعبۂ جات کے ذمہ داران، حق پرست اراکین سینٹ، قومی و صوبائی اسمبلی اور حالیہ بلدیاتی انتخابات میں کامیاب ہونے والے حق پرست بلدیاتی امیدواران کے ہمراہ سجدہ شکر ادا کیا۔ اس موقع پر کامیاب ہونے والی خواتین بلدیاتی امیدواران اور میڈیا نمائندگان کی بڑی تعداد بھی موجود تھی۔