ایم کیوا یم پر امن سیاسی جماعت ہے ہمارے بیگنا ہ کارکنان کو گرفتار کرکے معاشرے میں تشخص خراب کیا جارہاہے،رابطہ کمیٹی

کراچی ۔۔۔۔3دسمبر2015ء

متحد ہ قومی موومنٹ کی رابطہ کمیٹی نے پولیس و دیگر قانون نافذ کرنیوالے اداروں کی جانب سے شہر کے مختلف علاقوں میں چھاپے مار کارروائیوں کے دوران ایم کیوایم کے کارکنان کی گرفتاریوں کی سخت الفاظ میں مذمت کرتے ہوئے اسے بلدیاتی انتخابات کے دوران ایم کیوایم کو کمزور کرنے کی سازش قرار دیاہے۔ایک بیان میں رابطہ کمیٹی نے کہاکہ ایم کیوا یم پر امن سیاسی جماعت ہے جو جمہوری جدوجہد پر یقین رکھتی ہے لیکن ہمارے بیگنا ہ کارکنان کو گرفتار کرکے ان پر بے بنیا د اور جھوٹے الزاما ت لگاکر معاشرے میں انکا تشخص خراب کیا جارہاہے۔رابطہ کمیٹی نے کہاکہ گزشتہ رات پولیس نے علیگڑ ھ کالونی اورنگی ٹاؤن سے ایم کیوا یم کی پنجابی سرائیکی آرگنائزنگ کمیٹی کے مرکزی ذمہ دار فیض سلطان ولد اصغر، اورپی ایس او سی کے کارکن لیاقت ولد غلام نبی کو جبکہ دیگر قانون نافذ کرنیوالے ادارے کے اہلکاروں نے برنس روڈ سے یونٹ 24کے ذمہ دارمعراج ولد محمد صدیق اورکارکن افسر رحمن ولد عبد الرحمن کو انکے گھروں سے گرفتار کیا ہے جن کے متعلق تاحال انکے اہل خانہ کو کوئی معلومات فراہم نہیں کی گئی ہے۔انہوں نے کہاکہ اس قسم کے اقدامات کا مقصد بلدیاتی سرگرمیوں میں مصروف ہماری کارکنان کو پر امن سیاسی جدوجہد سے روکنا اور کراچی میں ڈنڈے کے ذور ایم کیوایم کا سیاسی مینڈیٹ من پسند جماعتوں کو دینے کی سازش ہے ۔رابطہ کمیٹی نے وزیر اعظم پاکستان ، چیف الیکشنر کمشنر سے مطالبہ کیا کہ وہ کارکنان کی بلاجواز گرفتاریوں کا سلسلہ فی الفور بند کرواکر بلدیاتی انتخابات میں دیگر جماعتوں کی طرح ایم کیو ایم کے کارکنان کو بھی اپنی سیاسی مہم چلانے کی کھلی آزادی دی جائے۔