رینجرز اہلکاروں کے ہاتھوں ایم کیوایم گلشن معمار اسکیم 33 کے کارکن عدیل کی گرفتاری پر رابطہ کمیٹی کا اظہار مذمت

کراچی ۔۔۔21، اکتوبر2015ء 

متحدہ قومی موومنٹ کی رابطہ کمیٹی نے رینجرزاہلکاروں کے ہاتھوں عزاداران حسین کیلئے لگائی گئی پانی کی سبیل پربیٹھے ہوئے ایم کیوایم گلشن معماراسکیم 33یونٹ33-Aکے کارکن عدیل کی گرفتاری کی شدید مذمت کی ہے ۔ ایک بیان میں رابطہ کمیٹی نے کہاکہ چھاپے و گرفتاریوں کے ذریعے ایم کیوایم کے کارکنان کے بلند حوصلوں کو ہر گز کمزور نہیں کیاجاسکتا اور نہ ہی غیر قانونی اورغیر آئینی ہتھکنڈے استعمال کرکے کارکنان کو قائد تحریک جناب الطاف حسین اور ایم کیوایم سے دور کیا جاسکتا ہے۔ رابطہ کمیٹی نے مزید کہاکہ ایم کیوایم کے کارکنان کو گھروں پر سوتے ہوئے ، ملازمتوں کے دوران اور مختلف راستوں سے تو چن چن کر گرفتار کیا ہی جارہا تھا لیکن اب عزاداران حسین کیلئے لگائی گئی پانی کی سبیل پر بیٹھے ہوئے ایم کیوایم کے کارکن عدیل کو بلاجواز گرفتار کرنا اور نامعلوم مقام پر منتقل کردینا سراسر ظلم ہے ۔ر ابطہ کمیٹی نے وزیراعظم میاں محمدنواز شریف ،وفاقی وزیرداخلہ چوہدری نثارعلی خان اورشکایت ازالہ کمیٹی کے ممبران سے مطالبہ کیاکہ رینجرزاہلکاروں کی جانب سے گلشن معماراسکیم 33یونٹ33-Aکے کارکن عدیل کی گرفتاری کافوری نوٹس لیاجائے اور غیر قانونی اور بلاجواز چھاپے و گرفتاریوں کا سلسلہ بند کرایاجائے ۔