ضمنی الیکشن این اے 246اور کنٹونمنٹ بورڈ کے بلدیاتی الیکشن میں ایم کیوایم کے امیدواروں کی بھاری اکثریت سے کامیابی مخالفین کیلئے نوشتہ دیوار ہے، انچارج و اراکین ایم کیو ایم شعبہ خواتین

کراچی ۔۔۔27، اپریل 2015ء 

متحدہ قومی موومنٹ شعبہ خواتین کی انچارج و حق پرست رکن قومی اسمبلی کشور زہرہ اور شعبہ خواتین کی اراکین نے کہا ہے کہ ضمنی الیکشن این اے 246اور کنٹونمنٹ بورڈ کے بلدیاتی الیکشن میں ایم کیوایم کے امیدواروں کی بھاری اکثریت سے کامیابی مخالفین کیلئے نوشتہ دیوار ہے اور حالیہ انتخابات میں حق پرست امیدواروں کی کامیابیوں پر عوام کا سہ روزہ جشن اس بات کی غمازی کرتا ہے کہ جناب الطا ف حسین کی مقبولیت میں دن بدن اضافہ ہورہا ہے۔اپنے مشترکہ بیان میں انہوں نے کہاکہ جناب الطا ف حسین اور ایم کیوایم کی مقبولیت کا گراف گرنے کے بلند وبانگ دعوے کرنے والے سیاسی و مذہبی جماعتوں کے رہنماؤں اور متعصب تجزیہ و کالم نگاروں کے غبارے سے ہوا نکل چکی ہے اور دنیا پر ثابت ہوچکا ہے کہ ایم کیوایم اور جناب الطا ف حسین کو تعصب اور نفرت کا نشانہ بنا نے والے سیاسی و مذہبی جماعتوں کا کوئی عوامی فلاح کا منشورنہیں ہے اور نہ ہی آج تک انہوں نے عوام کیلئے کچھ کیا بلکہ انکی سیاست جھوٹے الزامات اور بہتان تراشیوں پر مبنی ہے ۔۔انہوں نے کہا کہ متحدہ قومی موومنٹ کے مینڈیٹ کو تسلیم نہ کرنے والے عناصر کی جانب سے دراصل کراچی میں مستقل آباد تمام قومیتوں اور مسالک کے عوام کے جذبات کو مجروح کیاجارہا ہے اور ایسا گھناؤنا عمل کرنے والے عوامی عدالت میں جوابدہ ہوں گے ۔ انہوں نے کہا کہ جناب الطاف حسین نے ہمیشہ خواتین کے ساتھ ہونیوالے ظلم و جبر اور زیادتیوں کے خلاف آواز بلند کی ہے یہی وجہ ہے کہ حلقہ این اے 246کی جرأت مند و بہادر خواتین نے جناب الطاف حسین کے نامزد امیدوار کو اپنے ووٹ کے ذریعے کامیاب بنایا ہے جس پر ہم انکے شکر گزار ہیں ۔