ایم کیوایم آئندہ انتخابات میں پورے ملک سے بھرپور اندازمیں حصہ لے گی۔الطاف حسین

لاہور ۔۔۔26، جنوری 2013ء

متحدہ قومی موومنٹ کے قائد جناب الطاف حسین نے کہاہے کہ ایم کیوایم آئندہ انتخابات میں پورے ملک سے بھرپور اندازمیں حصہ لے گی اور پنجاب سے ہرنشست پر اپنے امیدوارکھڑے کرے گی۔ علیحدہ صوبہ کاقیام جنوبی پنجاب کے عوام کادیرینہ مطالبہ ہے اورایم کیوایم جنوبی پنجاب صوبہ کے قیام کیلئے اپنی جدوجہد جاری رکھے گی۔ یہ بات انہوں نے لاہورمیں ایم کیوایم پنجاب ہاؤس میں ایم کیوایم کی سینٹرل ایگزیکٹو کونسل ، لاہورزونل کمیٹی اور رابطہ کمیٹی کے مشترکہ اجلاس سے ٹیلی فون پر خطاب کرتے ہوئے کہی۔اجلاس کی صدارت جناب الطاف حسین نے کی ۔ اجلاس میں صوبہ جنوبی پنجاب کے قیام کی کوششوں کو تیز کرنے، پنجاب میں تنظیم سازی ،تنظیمی اسٹرکچرکی تشکیل نواور آئندہ انتخابات میں امیدواروں کے چناؤ سمیت دیگرتنظیمی امورپر تفصیلی غورخوض کیا گیا اور مختلف تجاویز پر تبادلہ خیال بھی کیا گیا۔اجلاس میں ایک قراردادکے ذریعے پنجاب خصوصاً لاہور میں امن وامان کی روزبروزبگڑتی ہوئی صورتحال پر گہری تشویش کااظہارکیاگیا۔اجلا س میں متفقہ طورپر طے کیا گیا کہ ایم کیوایم آئندہ انتخابات میں بھرپور طریقے سے حصہ لے گی اور پنجاب سے ہر نشست پر اپنے امیدوا رکھڑے کرے گی ۔اجلاس سے خطاب کرتے ہوئے جناب الطاف حسین نے کہاکہ ایم کیوایم کو اسکے قیام کے دن سے آج تک انگنت مسائل ومشکلات اورسازشوں کا سامنا رہا ہے ۔ جب جب ایم کیوایم نے پنجاب ، خیبرپختونخوا اورملک کے دیگرحصوں میں اپنے پیغام اور نظریئے کو پھیلانے کا عمل کیا تو سازشی عناصر نے ایم کیوایم کوملک بھرمیں پھیلنے سے روکنے کیلئے طرح طرح سے سازشیں کیں،کبھی فسادات کرائے، میڈیاکے ذریعے طرح طرح کے زہریلے پروپیگنڈے کرکے ایم کیوایم کاامیج خراب کرنے اورعوام کوایم کیوایم سے متنفرکرنے کی کوششیں کیں ۔ جناب الطاف حسین نے کہاکہ ایم کیو ایم ،ملک سے فرسودہ جاگیردارانہ نظام ، کرپٹ سیاسی کلچراور موروثی سیاست کا خاتمہ چاہتی ہے ، ہماری جدوجہد کا مقصد اقتدار کا حصول نہیں ہے، ہم پاکستان کی سلامتی وبقاء کو یقینی بناکر ملک وقوم کو ترقی وخوشحالی کی راہ پرگامزن کرنا چاہتے ہیں۔ یہ ملک وقوم کے ساتھ مذاق ہے کہ چند مخصوص خاندان نسل درنسل پاکستان پر حکمرانی کرتے چلے آرہے ہیں، ایم کیوایم اس موروثی سیاست کاخاتمہ کرکے ملک کا اقتدارغریب ومتوسط طبقہ کے تعلیم یافتہ اورایماندار افراد کے ہاتھوں میں دینا چاہتی ہے ۔ ایم کیوایم واحد جماعت ہے جو محض نعرے نہیں لگاتی بلکہ عمل کرکے بھی دکھاتی ہے، ایم کیوایم نے دولت کی بنیاد پر الیکشن لڑنے کی روایت کو توڑا، غریب ومتوسط طبقہ کے تعلیم یافتہ اورایماندار افراد کو اسمبلیوں میں بھیجااور جب جب ایم کیوایم کو موقع ملا اس نے عملاً عوام کی خدمت کی اور ترقیاتی کام کرکے کراچی ، حیدرآباد ، میرپورخاص اور سندھ کے دیگر شہروں کا نقشہ بدل دیا۔جناب الطاف حسین نے کہاکہ مجھے صدارت یا وزارت عظمیٰ کا منصب نہیں چاہئے ،میں صرف پاکستان کا فرسودہ نظام تبدیل کرنا چاہتا ہوں اورپاکستان کو قائداعظم ؒ اور علامہ اقبال ؒ کے وژن کے مطابق ایک صحیح جمہوری مملکت بنانا چاہتا ہوں اوراس مقصدکیلئے گزشتہ 22 سال سے جلاوطنی کی کربناک زندگی گزار رہا ہوں۔انہوں نے مزید کہاکہ یہ حقیقت ہے کہ دولت سے بڑے مکانات اور محلات خریدے جاسکتے ہیں لیکن لوگوں کی محبت نہیں خریدی جاسکتی۔ یہ حق پرستانہ فکروفلسفہ کی سچائی ہے کہ اپنے وطن سے جسمانی طورپر دور رہنے کے باوجودکروڑوں کارکنان وعوام مجھ سے محبت کرتے ہیں ۔ جناب الطاف حسین نے سینٹرل ایگزیکٹوکونسل پر زور دیا کہ وہ صوبہ پنجاب اور خیبرپختونخوا میں ان علاقوں کی سماجی اقدار کو مدنظر رکھتے ہوئے تنظیمی سیٹ اپ کی تشکیل نوکرے اور آئندہ انتخابات کیلئے صوبہ پنجاب سے امیدواروں کی فہرست بھی مرتب کریں۔انہوں نے ملک بھر کے مخیر حضرات سے اپیل کی کہ اسلام آباد میں دفتر کیلئے بھرپورمالی تعاون کریں اور اپنی بساط کے مطابق عطیات جمع کرائیں ۔جناب الطاف حسین نے سینٹرل ایگزیکٹوکونسل کے رکن اور سابق قومی کرکٹر سرفراز نواز کی علالت پر گہری تشویش کا اظہارکیا اور ان کی جلدومکمل صحت یابی کیلئے دعا بھی کی ۔

 

کراچی :۔۔۔26، جنوری 2013ء 

متحدہ قومی موومنٹ کے رابطہ کمیٹی ارکان وسیم آفتاب اور رضاہارون نے مسلح دہشت گردوں کی فائرنگ سے زخمی ہونے والے کراچی الیکڑونک مارکیٹ کے صدر و ممتاز تاجر رہنما عرفان خان کی کراچی کے مقامی اسپتال میں عیادت کی اور قائد تحریک جناب الطاف حسین کی جانب سے خیریت درفایت کی اور انکی جلد و مکمل صحتیابی کیلئے دعا کی۔ رابطہ کمیٹی کے ارکان نے عرفان خان سے گفتگو میں کہاکہ ایم کیوایم کی جانب سے عرفان خان پر قاتلانہ حملے کی سخت ترین الفاظ میں مذمت ہے اور اس واقعہ کو دہشت گردی قرار دیا ہے ۔ انہوں نے گورنر سندھ ڈاکٹر عشرت العباد اور وزیر اعلی ٰ سندھ سید قائم شاہ سے مطالبہ کیا ہے کہ وہ عرفان خان پر قاتلانہ حملے کا نوٹس لیا جائے اور اس میں ملوث دہشت گردوں کو گرفتار کرکے قانون کے مطابق سخت سے سخت سزادی جائے اور تاجربرداری اور عوام کے جان ومال کو محفوظ بنانے کیلئے ٹھو س و مثبت اقدامات بروئے کارلا ئے جائیں۔ 

 

کراچی ۔۔۔26، جنوری 2013ء 

ایم کیوایم کی رابطہ کمیٹی نے کراچی کے علاقے ناظم آبادمیں پتنگ کی ڈورگلے پرپھرنے سے7سالہ معصوم بچی کے جاں بحق ہونے پردلی افسوس اورگہری تشویش کا اظہارکیا ہے اورحکومت سے مطالبہ کیاکہ اس قسم کے حادثات کی روک تھام اورشہریوں کی قیمتی جانوں کے تحفظ کیلئے ٹھوس بنیادوں پراقدامات بروئے کار لائیں جائیں۔ایک بیان میں رابطہ کمیٹی نے ناگہانی حادثے کاشکارہونیوالی معصوم بچی کے غم زدہ والدین سمیت تمام سوگوارلواحقین سے دلی تعزیت و ہمدردی کااظہارکرتے ہوئے انہیں صبرکی تلقین کی۔رابطہ کمیٹی نے دعا کی کہ اللہ تعالیٰ بچی کوجنت الفردوس میں اعلیٰ مقام عطافرمائے اورغم زدہ والدین و دیگر تمام سوگوارلواحقین کوصبرجمیل عطاکرے۔ (آمین)دریں اثناء ایم کیوایم کے علاقائی ذمہ داران نے غم زدہ خاندان سے ملاقات کی اور ناگہانی حادثے میں بچی کی جاں بحق ہونے پرایم کیوایم کی جانب سے دلی تعزیت وہمدردی کااظہارکیااوربچی کے ایصال ثواب کیلئے فاتحہ خوانی کی۔