خدمت خلق فاؤنڈیشن کی جانب سے ایمبولینس گاڑیوں اوربھاری مالیت کا امدادی سامان اورجان بچانے والی ادویات سے لدے چارٹرک تھر کے قحط زدہ خاندانوں کی امداد کے لئے مٹھی روانہ کردیئے گئے

کراچی: ۔۔۔7، نومبر2014ء 

متحدہ قومی موومنٹ کے فلاحی ادارے خدمت خلق فاؤنڈیشن کی جانب سے دوایمبولینس گاڑیوں اورلاکھوں روپے مالیت کے امدادی سامان سے لدے چار(4)ٹرک تھر کے قحط زدہ خاندانوں کی امداد کے لئے مٹھی روانہ کردیئے گئے۔تھرمتاثرین کے لئے روانہ کیے گئے امدادی سامان میں غذائی اجناس آٹا،چاول،مختلف اقسام کی دالیں، چینی، گھی، تیل ،مصالحہ جات،خشک دودھ، چائے کی پتی اوربچوں کے لئے بیسکٹ ،جوس پرمشتمل پیکٹس،پانی کی بوتلیں اورروزمرہ استعمال کی اشیاء صرف صابن،ٹوتھ پیسٹ، منجن، کولر اور برتنوں کے علاوہ بھاری مقدارمیں جان بچانے والی ادویات شامل ہیں۔غذائی اجناس اورادویات سے لدے امدادی ٹرک اورایمبولینس گاڑیاں ایم کیوایم کے ڈپٹی کنوینر ڈاکٹر نصرت شوکت اور اراکین رابطہ کمیٹی محمدواسع جلیل، کہف الواریٰ اوراسلم آفریدی نے جمعہ کی شب اپنی نگرانی میں خدمت خلق فاؤنڈیشن کے مرکزی دفترفیڈرل بی ایریا سے مٹھی کے لئے روانہ کیے۔اس موقع پرایم کیوایم میڈیکل ایڈکمیٹی کے انچارج ڈاکٹرفاروق جمیل واراکین اورخدمت خلق فاؤنڈیشن کے رضاکاراوردیگرذمہ داران بھی موجودتھے۔