جناب الطاف حسین کی ہدایت پر منہاج القرآن کے تحت منعقدہ یوم شہداء کے سلسلے میں منہاج القرآن سیکریٹریٹ پر موجود کارکنان کے لئے اشیاء خورد و نوش کے تین ٹرک روانہ

لاہور۔۔۔10اگست 2014ء

لاہور میں تحریک منہاج القرآن کے زیراہتمام یوم شہداء کے شرکاء کو طبی سہولیات کی فراہمی کیلئے ایم کیوایم میڈیکل ایڈ کمیٹی کی 8رکنی طبی ٹیم اتوار کی شام روانہ کردی گئی ۔ طبی ٹیم کو خورشید بیگم سیکریٹریٹ عزیز آباد سے ایم کیوایم کی رابطہ کمیٹی کے ڈپٹی کنوینر ز ڈاکٹر خالد مقبول صدیقی، ڈاکٹر نصرت اور رابطہ کمیٹی کے دیگر اراکین نے اپنی نگرانی میں روانہ کیا ۔ طبی ٹیم کی سربراہی ایم کیوایم میڈیکل ایڈ کمیٹی کے انچارج ڈاکٹر فاروق جمیل کررہے ہیں جبکہ طبی ٹیم مرد اور خواتین ڈاکٹرز اور پیرا میڈیکل اسٹاف کے اراکین پر مشتمل ہے ۔ ایم کیوایم کی طبی ٹیم لاہور میں تحریک منہاج القرآن کے تحت ہونے والے یوم شہداء کے شرکاء کو طبی سہولیات کی فراہمی کیلئے مختلف مقامات پر طبی کیمپس قائم کرے گی ۔ طبی ٹیم کے پاس مختلف امراض سمیت جان بچانے والی ادویات ، سرجیکل کا سامان اور دیگر طبی آلات وافر مقدار میں موجود ہیں ۔ طبی ٹیم کی روانگی کے موقع پر رابطہ کمیٹی کے ڈپٹی کنوینرز نے گفتگو کرتے ہوئے کہا کہ جناب الطاف حسین کی ہدایت کے مطابق ایم کیوایم کی میڈیکل ٹیم سیاسی مقاصد کے بالاتر ہوکر یوم شہداء کے شرکاء کو خالصتاً طبی سہولیات کی فراہمی کیلئے روانہ کی جارہی ہے جبکہ طبی ٹیم میں شامل ایک ایک ڈاکٹر اور پیرا میڈیکل اسٹاف کا عملہ دکھی انسانیت کی خدمت کے جذبے سے سرشار ہے۔

دریں اثناء متحد ہ قومی موومنٹ کے قائد الطاف حسین کی ہدایت پرلاہور میں منہاج القرآن کے تحت یوم شہداء کے سلسلے میں موجود منہاج القرآن کے کارکنان کیلئے خدمت خلق فاؤنڈیشن کی جانب سے اشیاء خورد و نوش کے تین ٹرکوں پر مشتمل سامان روانہ کیاگیا ہے ۔ سامان میں بریانی، منرل واٹر کی بوتلیں ، بسکٹس ، جوس سمیت کھانے پینے کا دیگرسامان موجود ہے ۔ اس موقع پر ایم کیوا یم رابطہ کمیٹی کے اراکین سید امین الحق، عبد الحسیب ، خالد سلطا ن ، رشید گوڈیل اور افتخار اکبر رندھاوا، ایم کیو ایم سینٹرل پنجاب کے ذمہ داران ، کارکنان اور خدمت خلق فاؤنڈیشن کے رضاکاران کی بڑی تعداد اشیاء خور د و نوش کے ٹرکوں کے ہمراہ موجود ہے۔