ایم کیوایم پنجاب اورآزادکشمیر کے کارکنان بارش وسیلاب کے متاثرین کی ہرممکن مدد کریں ،الطاف حسین

لندن۔۔۔7، ستمبر2014ء

متحدہ قومی موومنٹ کے قائد جناب الطاف حسین نے ایم کیوایم پنجاب اورآزادکشمیرکے تمام ذمہ داران وکارکنان کو خصوصی ہدایت کی ہے کہ وہ اپنے غیر اہم کاموں کو چھوڑ کر پنجاب اورآزادکشمیر میں حالیہ طوفانی بارشوں اور سیلاب متاثرین کی جان ومال کے تحفظ کیلئے ہرممکن کوشش کریں ۔ ایک بیان میں جناب الطاف حسین نے کہا کہ پنجاب اورآزادکشمیر میں حالیہ طوفانی بارشوں اور سیلاب سے بڑے پیمانے پر جانی ومالی نقصان ہوچکا ہے، ہزاروں لو گ بے گھر ہوچکے ہیں اور کسمپرسی کی زندگی گزارنے پر مجبور ہیں ۔ انہوں نے ایم کیوایم پنجاب اورآزادکشمیر کے تمام ڈسٹرکٹ اور تحصیلوں کے ذمہ داران وکارکنان کو ہدایت کی کہ وہ اپنے تمام غیر اہم کاموں کو چھو ڑ کر مختلف ٹیمیں تشکیل دیں اور متاثرہ علاقوں میں جہاں ممکن ہو وہاں امدادی کیمپ لگائیں اور متاثرین کی ہر ممکن مدد کریں تاکہ انسانی زندگیوں کا تحفظ کیا جاسکے ۔