حق پرست سینیٹر نسرین جلیل کا پاکستان سکھ برادری کے نگراں سردار کشن سنگھ سے ٹیلی فونک رابطہ

کراچی ۔۔ 23مئی2014ء

متحدہ قومی موومنٹ سے منتخب سینیٹر نسرین جلیل نے پاکستان سکھ کونسل کے نگراں سرداررمیش سنگھ سے ٹیلیفو ن پر گفتگو کی اور اندرون سندھ بالخصوص شکار پور ڈسٹرکٹ میں گرودوارے کو نذر آتش کئے جانے کے واقعہ پر افسوس کا اظہار کیا ۔ حق پرست سینیٹر نسرین جلیل نے کہا کہ ایم کیو ایم سکھ برادری کی مقدس کتابوں اور مذہبی املاک کو نقصان پہنچانے کے واقعات کی شدید الفاظ میں مذمت اور سکھ برادری کے ساتھ مکمل اظہار ہمدردی کرتی ہے ۔ انھوں نے کہا کہ اسلام امن و سلامتی کا مذہب ہے جو اپنے ماننے والوں کو دیگر مذاہب کے احترام کا درس دیتا ہے اور انتہا پسندی کے خلاف ہے ۔انھوں نے کہا کہ ایم کیوایم کے قائد الطاف حسین نے ہمیشہ ایک دوسرے سے محبت اور اقلیتوں کے احترام کا درس دیا ہے ۔سرداررمیش سنگھ نے اظہار ہمدردی کرنے پر جناب الطاف حسین کا شکریہ ادا کیا اور ایم کیو ایم کو سکھ برادری کی جانب سے ہر ممکن تعاو ن کی یقین دہانی کروائی ۔حق پرست سینیٹر نے وزیر اعظم پاکستان میا ں محمد نواز شریف ، وفاقی وزیر داخلہ چوہدری نثار علی،وفاقی وزیر برائے اقلیتی امورسردار محمد یوسف ، گورنر سند ھ ڈاکٹر عشرت العبا د اوروزیر اعلیٰ سندھ سید قائم علی شاہ متعلقہ حکام سے مطالبہ کیا ہے کہ وہ اندرون سندھ بالخصوص ڈسٹرکٹ شکار پور میں سکھ برادی کے مقدس مقامات اور کتابوں کی بے حرمتی کا نوٹس لیں اور اس انتہا پسند ی میں ملوث انتشار پسند عناصر کو گرفتا کر کے کیفر کردار تک پہنچائیں اور آئندہ اس قسم کے واقعات کے تدراک کے لیے خصوصی انتظامات کرکے ملک بھر کی اقلیتی برادر ی کو تحفظ فراہم کریں۔