پرعزم اورمخلص کارکنان وعوام کی محبت ہی میرا سب سے قیمتی سرمایہ ہے، الطاف حسین

لندن۔۔۔2، فروری 2014ء

متحدہ قومی موومنٹ کے قائد جناب الطاف حسین نے پاکستان سمیت دنیا بھر میں ایم کیوایم کے کارکنان وعوام کی جانب سے پرامن طریقے سے اظہاریکجہتی کے اجتماعات کے انعقاد پر ایم کیوایم کے رہنماؤں ، ذمہ داروں ، کارکنوں اور ہمدرد عوام سے دلی تشکرکااظہار کیا ہے ۔ایک بیان میں جناب الطاف حسین نے کہاکہ ایم کیوایم اور میرے خلاف منفی پروپیگنڈوں پر پاکستان سمیت دنیا کے مختلف ممالک میں موجود کارکنان وعوام نے جس طرح اپنی تشویش کا اظہار کیا،اظہاریکجہتی کیلئے اجتماعات منعقد کیے اور مجھ سے اپنی والہانہ عقیدت ومحبت کا اظہار کیا ہے اس پر میں اللہ تعالیٰ کا لاکھ لاکھ شکر اور اپنے پرعزم اور مخلص کارکنان وعوام کا شکریہ ادا کرتا ہوں۔ اپنے ساتھیوں کی عقیدت ومحبت کے جذبے سے میرے حوصلے مزید بلند ہوئے ہیں اور میں ایک مرتبہ پھر اس عزم کا اعادہ کرتا ہوں کہ میں کسی بھی باطل قوت کے آگے سرنہیں جھکاؤں گا۔

جناب الطاف حسین نے ایم کیوایم کی رابطہ کمیٹی ، منتخب نمائندوں ، تمام شعبہ جات،ونگز ،زونوں، سیکٹروں اور یونٹوں اورایم کیوایم اوورسیز یونٹوں کے ذمہ داران وکارکنان کے علاوہ اہلیان کراچی کی تمام ماؤں ، بہنوں ، بیٹیوں ، بزرگوں ، نوجوانوں ، بچوں ، بچیوں ، تمام مکاتب فکر کے علمائے کرام وعوام، تمام قومیتوں سے تعلق رکھنے والے سندھی ، بلوچی، پختون ، بلوچی، سرائیکی، کشمیری ، ہزاروال ،گلگتی، بلتستانی، مختلف برادریوں اور غیرمسلم پاکستانیوں سمیت ایک ایک فرد کو پرامن طریقے سے یکجہتی کے اظہارپر دل کی گہرائیوں سے شکریہ ادا کرتے ہوئے کہاکہ پرعزم اورمخلص کارکنان وعوام کی محبت ہی میرا سب سے قیمتی سرمایہ ہے اور مجھے اپنے جیالے کارکنان وعوام پرکل بھی ناز تھا اور آج بھی ناز ہے ۔ جناب الطاف حسین نے دعا کی کہ اللہ تعالیٰ ایک ایک حق پرست کو مجھ سے والہانہ عقیدت ومحبت اور یکجہتی کے اظہار پر اجرعظیم عطافرمائے، انہیں اپنی حفظ وامان میں رکھے اور سب کو صحت مند وخوشحال زندگی عطا کرے ۔ (آمین)