اتحادبین المسلمین فورم کے صدر،ممتازو معروف عالم دین اور مذہبی اسکالر مولانا تنویرالحق تھانوی کی ایم کیوایم کے قائد الطاف حسین سے انٹرنیشنل سیکریٹریٹ لندن میں ملاقات

لندن۔۔۔23، جنوری2014ء

اتحادبین المسلمین فورم کے صدر،ممتازو معروف عالم دین اور مذہبی اسکالر مولانا تنویرالحق تھانوی نے ایم کیوایم کے قائدجناب الطاف حسین سے ایم کیوایم انٹرنیشنل سیکریٹریٹ لندن میں ملاقات کی اوران سے پاکستان کی موجودہ صورتحال پر تفصیلی گفتگوکی۔ جناب الطاف حسین نے دینی تعلیمات کے فروغ، فرقہ واریت کے خاتمہ اوراتحادبین المسلمین کیلئے مولاناتنویرالحق تھانوی کی خدمات کوسراہا۔جناب الطاف حسین نے مولاناتنویرالحق سے کہاکہ آپ اور اتحادبین المسلمین فورم میں شامل دیگر علمائے حق جس ہمت وجرات کے ساتھ فرقہ واریت کے خاتمہ اور دہشت گردوں کی خودساختہ شریعت کے خلاف آوازحق بلند کررہے ہیں،جلسے جلوس، سیمیناراور پریس کانفرنسیں کرکے عوام میں آگاہی پھیلارہے ہیں اس پر میں آپ اور دیگر علمائے حق کو دل کی گہرائیوں سے سلام تحسین پیش کرتا ہوں۔میری دعا ہے کہ اللہ تعالیٰ آپ اور آپ کے ساتھیوں کو اس کا اجرعظیم عطا فرمائے اور آپ جیسے علمائے حق کی تعداد میں مزید اضافہ کرے تاکہ کوئی کسی پر زبردستی اپنے نظریات مسلط نہ کرسکے ۔مولاناتنویرالحق تھانوی نے جناب الطا ف حسین سے گفتگوکرتے ہوئے کہاکہ تمام علمائے حق اس بات کابرملااعتراف کرتے ہیں کہ طالبانائزیشن کے خلاف سب سے پہلے آپ ہی نے کھل کرآوازبلندکی ، قوم کواس کے خطرات سے آگاہ کیااورآپ ہی اس بارے میں مسلسل ڈٹ کرآوازبلندکررہے ہیں ۔یہی وجہ ہے کہ تمام مکاتب فکرکے علمائے حق دل سے آپ کااحترام کرتے ہیں۔ اس موقع پر مولانا تنویرالحق تھانوی نے جناب الطاف حسین کو اپنے والد محترم مولانا احتشام الحق تھانوی کے خطابات کا مجموعہ بھی پیش کیا۔