پرامن جمہوری احتجاج کرنا ہر سیاسی جماعت کا آئینی، قانونی، جمہوری اور انسانی حق ہے، رابطہ کمیٹی

کراچی ۔۔۔8، جون2016ء

متحدہ قومی موومنٹ کی رابطہ کمیٹی نے ایم کیوایم کی پرامن ہڑتال کی اپیل کے خلاف ڈی جی رینجرز کے بیان کی شدیدالفاظ میں مذمت کرتے ہوئے کہاہے کہ ایم کیوایم کو آئینی ، قانونی اورجمہوری حق سے روکنے کا عمل قطعی غیرقانونی اور بنیادی انسانی حقوق کی سنگین خلاف ورزی ہے ۔ ایک بیان میں رابطہ کمیٹی نے کہاکہ پرامن جمہوری احتجاج کرنا ہرسیاسی جماعت کا آئینی ، قانونی ، جمہوری اور انسانی حق ہے، ایم کیوایم نے رینجرز کے غیرقانونی اورغیرانسانی اقدامات کے خلاف پرامن احتجاج کی اپیل کرکے اپنا جمہوری حق استعمال کیاہے جسے ریاستی طاقت سے روکنے کا عمل نہ صرف غیرقانونی وغیرجمہوری ہے بلکہ بنیادی انسانی حقوق کی بھی سنگین خلاف ورزی ہے جس کی جتنی بھی مذمت کی جائے کم ہے ۔ رابطہ کمیٹی نے کہاکہ ایک جانب لاکھوں عوام کی منتخب نمائندہ جماعت کو کچلنے، چھاپے ، گرفتاریوں اور محاصروں کے ذریعہ عوام کے منتخب نمائندوں کوہراساں کرنے کا ظالمانہ عمل کیاجارہا ہے اور دوسری جانب سے ایم کیوایم کے پرامن اورجمہوری احتجاج کوغیرقانونی قراردیکرایم کیوایم سے اس کا یہ جمہوری وقانونی حق بھی چھینا جارہا ہے ۔ رابطہ کمیٹی نے کہاکہ رینجرز کی جانب سے ایم کیوایم کواس کے آئینی ، جمہوری اور قانونی حق سے محروم کرنے کا عمل خود غیرقانونی ہے اور ہرانسانیت اور جمہوریت پسند فرد اور جماعت کو رینجرز کے غیرقانونی اور غیرانسانی عمل کی کھل کرمذمت کرنی چاہیے ۔