ایم کیوایم حیدرآباد کے سابق سیکٹر انچارج ندیم قاضی کو فی الفور رہا کیاجائے ، رابطہ کمیٹی

کراچی ۔۔۔24، مئی2016ء

متحدہ قومی موومنٹ کی رابطہ کمیٹی نے ایم کیوایم حیدرآباد زون کے سابق سیکٹر انچارج ندیم قاضی کی بلاجوا ز گرفتاری کی سخت ترین الفاظ میں مذمت کی ہے اور اس قسم کے واقعات کو ایم کیوایم کے خلاف سازشوں کا تسلسل قراردیا ہے ۔ ایک بیان میں رابطہ کمیٹی نے کہاکہ ایم کیوایم حیدرآباد سیکٹر G کے سابق انچارج ندیم قاضی ولد قاضی معین الدین بورڈآفس حیدرآباد میں ملازمت کرتے ہیں ، آج ڈبل کیبن ویگو گاڑی اور متعددپولیس موبائلوں میں سوارپولیس او رسی آئی اے کے اہلکاروں نے بورڈآفس حیدرآباد میں چھاپہ مارکرندیم قاضی کو بلاجواز گرفتارکرلیا۔ رابطہ کمیٹی نے کہاکہ ایک منظم سازش کے تحت کراچی اور حیدرآباد میں ایم کیوایم کے ذمہ داروں ،کارکنوں اورمنتخب عوامی نمائندوں کو گرفتارکرکے ان پر سیاسی وفاداری تبدیل کرنے کیلئے دباؤ ڈالاجارہا ہے اور ندیم قاضی کی گرفتاری بھی اسی سازش کا تسلسل ہے جس کی جتنی بھی مذمت کی جائے کم ہے ۔ رابطہ کمیٹی نے کہاکہ غیرقانونی چھاپوں اور گرفتاریوں سے نہ تو ایم کیوایم کے پرعزم ذمہ داروں اور کارکنوں کے حوصلے پست کیے جاسکتے ہیں اورنہ ہی اس قسم کے اوچھے ہتھکنڈوں سے کارکنان وعوام کو حق پرستانہ جدوجہد سے باز رکھا جاسکتا ہے ۔ رابطہ کمیٹی نے وفاقی وصوبائی حکومتوں سے مطالبہ کیاکہ ندیم قاضی کی بلاجواز وغیرقانونی گرفتاری کا نوٹس لیاجائے، انہیں فی الفور رہاکیاجائے اورایم کیوایم کے خلاف سازشوں کا سلسلہ بند کرایاجائے ۔