سرکاری سرپرستی میں قائم ایک نام نہاد ٹولے کے مسلح افرادکا حیدرآبادمیں ایم کیوایم کے زونل آفس پر حملہ

کراچی ۔۔۔ 13؍ مئی 2016ء

متحدہ قومی موومنٹ کی رابطہ کمیٹی نے بھائی خان چاڑی حیدرآباد پر واقع ایم کیو ایم کے زونل آفس پرسرکاری سرپرستی میں قائم ایک نام نہادٹولے کے دہشت گردوں کے حملے ، کارکنوں پرتشدداورفائرنگ کی شدید الفاظ میں مذمت کی ہے۔ اپنے ایک بیان میں انہوں نے کہا کہ اسٹیبلشمنٹ نے ایک طرف کراچی میں حقیقی دہشت گردوں کو ایم کیوایم کے خلاف سرگرم کردیاہے تودوسری جانب اسٹیبلشمنٹ کے قائم کردہ ایک دوسرے ٹولے کو حیدرآباد میں سرگرم کردیا گیا ہے۔ آج اس ٹولے کے افرادنے جرائم پیشہ عناصر کے ساتھ ملکرحیدرآبادمیں زونل آفس پر اچانک حملہ کرکے آفس کے باہرکھڑے کارکنوں پرتشدد کیا، فائرنگ کی جس سے کارکنوں کے ساتھ ساتھ خواتین بھی زخمی ہوئیں۔مسلح حملہ آوروں نے ایم پی اے راشدخلجی پر قاتلانہ حملہ کیا اورزونل کمیٹی کے رکن راشدممتازپر بھی فائرنگ کی ۔رابطہ کمیٹی نے کہاکہ اس حملے میں ان جرائم پیشہ افرادکو سرکاری سرپرستی حاصل تھی ، ان کے ساتھ پولیس بھی موجودتھی جس نے ان حملہ آوروں کے خلاف کارروائی کرنے کے بجائے ان کوتحفظ فراہم کیا۔ رابطہ کمیٹی نے اس کھلی دہشت گردی کی شدیدمذمت کرتے ہوئے کہاکہ کراچی میں لانڈھی اورحیدرآبادمیں پیش آنے والے اس واقعہ سے صاف ظاہرہے کہ یہ سب کچھ ایک طے شدہ منصوبہ بندی کے تحت ہورہاہے اورایم کیوایم کو دہشت گردی کانشانہ بنانے کیلئے ان عناصر کوباقاعدہ سرگرم کیاگیاہے اورجان بوجھ کریہ حملے کرائے جارہے ہیں۔ رابطہ کمیٹی نے کہاکہ اس قسم کی اوچھی حرکتوں سے ایم کیوایم کونہیں حیدرآبادکے امن کونقصان پہنچے گالہٰذایہ سلسلہ فی الفوربندکرایاجائے اور اس واقعہ میں ملوث دہشت گردوں کوفی الفور گرفتار کیا جائے ۔رابطہ کمیٹی نے حملے میں زخمی ہونے والے کارکنوں اورہمدردوں سے دلی ہمدردی کااظہارکیا۔