ایم کیوایم کی رابطہ کمیٹی کے سینئر ڈپٹی کنوینر ڈاکٹر فاروق ستار کی حق پرست اراکین قومی و صوبائی اسمبلی کے ہمراہ ایم ڈی واٹر بورڈ سے ملاقات

کراچی ۔۔۔13، اپریل2016ء 

متحدہ قومی موومنٹ کی رابطہ کمیٹی کے سینئر ڈپٹی کنوینر ڈاکٹر فاروق ستار نے حق پرست اراکین قومی وصوبائی اسمبلی کے ہمراہ ایم ڈی واٹر بورڈ مصباح الدین اور دیگر افسران سے ملاقات کی اور شہر کے مختلف علاقوں میں پانی کے شدید بحران پر عوام میں پائی جانے والی تشویش سے آگاہ کیا ۔ ایم کیوایم کے وفد میں حق پرست اراکین قومی اسمبلی مزمل قریشی ، آصف حسنین ، اراکین صوبائی اسمبلی خالدافتخار ، ریحان ظفر ، سیف الدین خالد ، ندیم راضی ، شازیہ جاوید شامل تھے ۔ ملاقات میں ڈاکٹر فاروق ستار نے اورنگی ٹاؤن ، پاک کالونی میں جب ریور سے پانی کی عدم فراہمی اور سائٹ ایریا ، ناظم آباد ، گلبہار ، ساؤتھ ، اولڈ سٹی ایریا ، نارتھ کراچی ، نئی کراچی ، گلستان جوہر ، گلشن اقبال ، لانڈھی ، کورنگی اور ملیر سمیت ملحقہ علاقوں میں پانی کی غیر منصفانہ تقسیم اور والو آپریشن سمیت دیگر مسائل پر تبادلہ خیال کیا ۔ ڈاکٹر فاروق ستار نے کہاکہ شہر میں موسم گرما کی آمد ہے اور پانی کے بحران سے شہریوں کو شدید پریشانیوں کا سامنا ہے جس کے باعث لوگوں کے معمولات زندگی بری طرح سے متاثر ہورہے ہیں ۔ ڈاکٹر فاروق ستار نے کہاکہ واٹر بورڈ پر مسلط کی گئی سندھ حکومت کی پالیسیوں پر حکومت سندھ سے بات کی جائے گی اور شہر میں پانی کے بحران کے خاتمے کیلئے ایم کیوایم ہرسطح پر آواز بلند کرے گی ۔ ملاقات میں ایم ڈی واٹر بورڈ انے ایم کیوایم کے وفد کو پانی کی قلت ، پانی کی غیر منصفانہ تقسیم اور والو آپریشن کے مسائل حل کرنے کی یقین دہانی کرائی۔