حقیقی دہشت گردوں کی لانڈھی میں ایم کیوایم کے کارکن کے گھر پر فائرنگ ، نومنتخب حق پرست یوسی چیئرمین اور کارکنان کے گھروں اور کارخانوں پر جاکر اہلخانہ اور ملازمین کو ہراساں کرنے اور سنگین نتائج کی دھمکیاں دینے پر رابطہ کمیٹی کااظہار مذمت

کراچی ۔۔۔13، اپریل2016ء 

متحدہ قومی موومنٹ کی رابطہ کمیٹی نے حقیقی دہشت گردوں کی جانب سے لانڈھی میں ایم کیوایم کے کارکن کے گھر پر فائرنگ ، یوسی 19زمان آباد کے نومنتخب حق پرست چیئرمین سمیت دیگر کارکنان کے گھروں اور کارخانوں میں جاکر ان کے اہل خانہ اور ملازمین کو ہراساں کرنے اور سنگین نتائج کی دھمکیاں دیئے جانے کی سخت ترین الفاظ میں مذمت کی ہے ۔ایک بیان میں رابطہ کمیٹی نے کہاکہ حقیقی دہشت گرد وں نے کل لانڈھی ٹاؤن کے سابق رکن تقی کی رہائشگاہ پر فائرنگ کی ،لانڈھی ٹاؤن یوسی 21کے انچارج احمد علی کے گھر اور کارخانے پر جاکر ان کے اہل خانہ اور ملازمین کو سنگین نتائج کی دھمکیاں دیں جبکہ زمان آباد یوسی 19کے نومنتخب چیئرمین نعمان کو ان کے ہاتھ پاؤں توڑنے اور جان سے مارنے کی دھمکیاں دیں ۔ رابطہ کمیٹی نے کہاکہ ایک جانب ایم کیوایم کے کارکنان کو ان کے گھروں سے گرفتار کیاجارہا ہے اور انہیں جھوٹے مقدمات میں ملوث کیاجارہا ہے جبکہ دوسری جانب حقیقی دہشت گردوں کو مکمل سرکاری سرپرستی میں کھلی غنڈہ گردی اور خوف و ہراس پھیلانے کی چھوٹ دی جارہی ہے جس کی جتنی بھی مذمت کی جائے کم ہے ۔ رابطہ کمیٹی نے کہاکہ ایم کیوایم کے ذمہ داران و کارکنان کو ایسے اوچھے ہتھکنڈے استعمال کرکے نہ تو ماضی میں خوفزدہ کیا جاسکا ہے اور نہ ہی آج ان کے حصولے کم کئے جاسکتے ہیں ۔ رابطہ کمیٹی نے وزیراعظم نواز شریف ،و فاقی وزیر داخلہ چوہدری نثار علی خان اور وزیراعلیٰ سندھ قائم علی شاہ سے مطالبہ کیا کہ لانڈھی میں حقیقی دہشت گردوں کی ایم کیوایم کے کارکن کے گھر پر فائرنگ اور گھروں اور کارخانوں میں جاکر سنگین نتائج کی دھمکیاں دیئے جانے کا سنجیدگی سے نوٹس لیاجائے اور حقیقی دہشت گردوں کو حاصل سرکاری سرپرستی کا سلسلہ فی الفور بند کراکر انہیں قانون کے تحت سخت سے سخت ترین سزا دی جائے ۔