وزیراعلیٰ ہاؤس کے باہر سندھ پروفیسر ز اینڈ لیکچرار ایسوسی ایشن ’’سپلا‘‘ کے مظاہرین پر تشدد ، ان کی گرفتاریوں اور واٹر کینن کے استعمال پر ایم کیوایم رابطہ کمیٹی کااظہار مذمت

کراچی ۔۔۔30، مارچ2016ء 

متحدہ قومی موومنٹ کی رابطہ کمیٹی نے وزیراعلیٰ ہاؤس کے باہر سندھ پروفیسر ز اینڈ لیکچرار ایسوسی ایشن ’’سپلا‘‘ کے مظاہرین پر تشدد ، ان کی گرفتاریوں اور واٹر کینن کے استعمال کی سخت ترین الفاظ میں مذمت کی ہے اور کہا ہے کہ اپنے جائز مطالبات کے حق میں مظاہرہ کرنے والے اساتذہ کو تشددکا نشانہ بنانا انتہائی شرمناک اور افسوس کا مقام ہے ۔ ایک بیان میں رابطہ کمیٹی نے کہاکہ سند حکومت نے سپلا کے احتجاجی اساتذہ کے جائز مطالبات سننے اور انہیں حل کرنے کے بجائے تشدد کا راستہ اختیار کیا اور انہیں سرعام رسوا کیا جس سے اساتذہ کرام کے رتبے کی توہین ہوئی ہے۔ رابطہ کمیٹی نے کہاکہ اساتذہ کے جائز مطالبات سننے اور انہیں حل کرنے سے راہِ فرار اختیار کرنے اور الٹا انہیں تشدد کا نشانہ بنانے سے ثابت ہوچکا ہے کہ سندھ حکومت بے حسی اور بدانتظامی کی حدیں عبور کرچکی ہے اور اساتذہ کرام کے رتبے اور احترام تک کو فراموش کرچکی ہے جس کی جتنی بھی مذمت کی جائے کم ہے ۔رابطہ کمیٹی نے کہاکہ اساتذہ کرام کو تشدد کا نشانہ بنانے اور ان کی بلاجواز گرفتاریوں سے ملک کے معماروں کے ذہنوں پر منفی اثرات مرتب ہوئے ہیں اور اس کی تمام تر ذمہ داری سندھ حکومت پر عائد ہوتی ہے ۔ رابطہ کمیٹی نے وزیراعظم نواز شریف اور وزیراعلیٰ سندھ قائم علی شاہ سے مطالبہ کیا کہ سپلا کے احتجاجی مظاہرین میں شریک اساتذہ اور پروفیسر ز کو پولیس کی جانب سے تشدد کا نشانہ بنانے ، ان کی گرفتاریوں اور واٹرکینن کے استعمال کا سختی سے نوٹس لیاجائے ، گرفتار اساتذہ کو فی الفور رہاکیاجائے اور سپلا کے احتجاجی مظاہرین کے جائز مطالبات سے راہِ فرار اختیار کرنے کے بجائے انہیں حل کیاجائے ۔