اورنگی ٹاؤن گلشن ضیاء میں زیادتی کے بعد معصوم پاکیزہ کی لاش 5روز بعد ٹینک سے ملنے کے واقعہ پر رابطہ کمیٹی کااظہار مذمت

کراچی ۔۔۔یکم ، فروری 2016ء 

متحدہ قومی موومنٹ کی رابطہ کمیٹی نے اورنگی ٹاؤن گلشن ضیاء میں معصوم پاکیزہ نامی بچی کی 5روز بعد ٹینک سے لاش ملنے کے واقعہ کی سخت ترین الفاظ میں مذمت کی ہے اور معصوم بچی کے ساتھ زیادتی کا عنصر پائے جانے پر مطالبہ کیا ہے کہ اس واقعہ میں ملوث درندہ صفت افراد کو گرفتار کرکے قرار واقعی سزا دی جائے ۔ ایک بیان میں رابطہ کمیٹی نے کہاکہ پاکیزہ نامی بچی کے ساتھ رونما ہونے والے دالخراش واقعہ نے ہر شخص کو افسردہ کردیا ہے اور اس واقعہ میں ملوث عناصر سخت سے سخت سزا کے مستحق ہیں ۔ رابطہ کمیٹی نے معصوم پاکیزہ کے تمام سوگوار لواحقین سے دلی تعزیت وہمدردی کااظہار کرتے ہوئے انہیں صبر کی تلقین کی اور دعا کی کہ اللہ تعالیٰ مرحومہ کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے۔ (آمین)

دریں اثناء معصوم پاکیزہ کو آج سینکڑوں سوگواران کی آہوں ور سسکیوں کے درمیان گلشن ضیاء کے قبرستان میں سپرد خاک کردیا گیا ۔ مرحومہ کی نماز جنازہ مقامی گراؤنڈ میں ادا کی گئی ۔ نما ز جنازہ اور تدفین میں ایم کیوایم کے رکن قومی اسمبلی محبوب عالم ، یوسیز اور ٹاؤن کے ذمہ داران ، کارکنان ، ہمدردوں اور مرحومہ کے عزیز واقارب نے شرکت کی ۔