ایم کیوایم کے تحت زلزلہ متاثرین کی امداد کیلئے کراچی میں 40 سے زائد مختلف مقامات پر امدادی کیمپ قائم کردیئے گئے

لندن۔۔۔27، اکتوبر2015ء

متحدہ قومی موومنٹ کے قائد جناب الطاف حسین کی ہدایت پر زلزلہ سے متاثرہ خاندانوں کی امداد کیلئے آج ملک بھر میں خدمت خلق فاؤنڈیشن کے تحت امدادی کیمپ لگادیئے گئے ہیں جہاں عوام کی جانب سے زلزلہ متاثرین کیلئے امدادی اشیاء جمع کرائی جارہی ہیں۔ ایم کیوایم اور خدمت خلق فاؤنڈیشن کے تحت کراچیمیں 40 سے زائد مختلف مقامات پر امدادی کیمپ لگائے گئے ہیں اس کے علاوہ، حیدرآباد ، ٹنڈوالہیار، جامشورو،میرپورخاص، سکھر، نواب شاہ ، سانگھڑاور اندرون سندھ کے دیگر شہروں کے ساتھ ساتھ صوبہ پنجاب ، صوبہ خیبرپختونخوا اور صوبہ بلوچستان میں بھی امدادی کیمپس لگائے گئے ہیں۔ ان امدادی کیمپوں میں زندگی کے مختلف شعبوں سے تعلق رکھنے والے عوام کی جانب سے زلزلہ سے متاثرہ عوام کیلئے خشک اجناس، گرم کپڑے اور دیگر امدادی اشیاء جمع کرانے کا سلسلہ جاری ہے ۔ 

دریں اثناء ایم کیوایم کے قائد جناب الطاف حسین نے کراچی کے مختلف علاقوں میں قائم خدمت خلق فاؤنڈیشن کے امدادی کیمپوں میں موجود ایم کیوایم کے ذمہ داران ، کارکنان اور ہمدردوں سے ٹیلی فون پر خطاب کرتے ہوئے زلزلہ متاثرین کیلئے امدادی سرگرمیوں کی تفصیلات معلوم کیں۔ اپنے خطاب میں انہوں نے کہاکہ خلق خدا کی خدمت سب سے بڑی عبادت ہے اور ایم کیوایم ،دکھی انسانیت کی خدمت ، عبادت سمجھ کرکرتی رہی ہے ۔ انہوں نے ایم کیوایم کے کارکنان سے کہاکہ آپ یہ مت دیکھیں کہ کون آپ کیلئے کیاکررہا ہے بلکہ آپ یہ دیکھیں کہ آپ مصیبت، آزمائش اور مشکل کی گھڑی میں کسی کی کیا مدد کرسکتے ہیں۔ انہوں نے کہاکہ 2005ء کے قیامت خیز زلزلے میں ایم کیوایم نے زلزلہ متاثرین کی سب سے زیادہ مدد کی جس کے گواہ اللہ تعالیٰ اور پاکستان کے عوام ہیں لیکن اس کے باوجود بعض منافقین ایم کیوایم کی عوامی خدمت سے انکار کرتے ہیں۔ مخالفت کے باوجود ہمارا کام انسانیت کی خدمت کرنا ہے ، انسانیت کی خدمت سب سے بڑی عبادت ہے اور یہی ایم کیوایم کا پہلے دن سے منشور تھا، آج بھی ہے اور انشاء اللہ ہمیشہ رہے گا۔ جناب الطاف حسین نے ملک بھرکے حق پرست عوام بالخصوص مخیر حضرات سے اپیل کی کہ وہ خدمت خلق فاؤنڈیشن کے امدادی کیمپ میں زلزلہ متاثرین کیلئے اپنی بساط کے مطابق امدادی سامان جمع کرائیں ، متاثرین کیلئے خشک اجناس، چائے کی پتی ، شکر، خشک دودھ، بچوں کیلئے دودھ، پانی کی بوتلیں، دالیں ، چاول ، گرم کپڑے ، کمبل اور روزمرہ استعمال کی دیگر اشیاء عطیہ کریں تاکہ زلزلہ متاثرین کی بھرپورمدد کی جاسکے ۔ جناب الطاف حسین نے ہولناک زلزلہ سے جاں بحق ہونے والے افراد کے سوگوارلواحقین سے دلی تعزیت وہمدردی کااظہار کیا اور زخمیوں کی جلدومکمل صحت یابی کیلئے دعا بھی کی۔
English
تصاویر