سپریم کورٹ کی جانب سے اردو کو سرکاری طور پر رائج کرنے کے احکامات کا خیرمقدم کرتے ہیں۔ رابطہ کمیٹی ایم کیوایم

کراچی ۔۔۔ 8 ستمبر 2015ء

متحدہ قومی موومنٹ کی رابطہ کمیٹی نے سپریم کورٹ کی جانب سے قومی زبان اردو کوسرکاری طورپر رائج کرنے کے احکامات کا زبردست خیرمقدم کیا ہے۔ اپنے ایک بیان میں رابطہ کمیٹی نے کہا کہ ویسے توقیام پاکستان کے ساتھ ہی اردوکوقومی زبان قراردیدیا گیا تھا لیکن  68سال گزرجانے کے باوجوداردوکوسرکاری طور پررائج نہیں کیاگیاتھااورآج تک تمام دفتری امورانگریزی زبان میں انجام دیے جاتے رہے ہیں۔یہ امرخوش آئندہے کہ سپریم کورٹ نے اردو کو سرکاری طورپررائج کرنے کے واضح احکامات جاری کئے ہیں جس پر سپریم کورٹ کے چیف جسٹس جناب جسٹس جواد ایس خواجہ اور بینچ میں شامل تمام جج صاحبان مبارکبادکے مستحق ہیں۔ رابطہ کمیٹی نے امید ظاہر کی کہ حکومت سپریم کورٹ کے ان احکامات پر عمل کرتے ہوئے اردوزبان کوسرکاری طورپررائج کرنے کے عملی اقدامات کرے گی۔