سانحہ صفورا کے شہداء کو خراج عقیدت پیش کرنے کیلئے ایم کیوایم کے زیر اہتمام لندن میں تعزیتی اجتماع منعقد کیا گیا

لندن ۔۔۔ 17 مئی 2015ء

سانحہ صفورا کے شہداء کوخراج عقیدت پیش کرنے کے لئے متحدہ قومی موومنٹ کے زیراہتمام لندن میں تعزیتی اجتماع منعقد کیا گیا۔ تعزیتی اجتماع میں ایم کیو ایم کی رابطہ کمیٹی کے سینئرڈپٹی کنوینرندیم نصرت ،رابطہ کمیٹی کے دیگر ارکان، ایم کیوایم یوکے ذمہ داران اور کارکنان نے شرکت کی۔ اس موقع پر سانحہ صفورا میں سفاک دہشت گردوں کے ہاتھوں شہید ہونے والے اسماعیلی کمیونٹی کے معصوم وبے گناہ افراد کو خراج عقیدت پیش کرنے کے لئے شمعیں جلائی گئیں۔ اس موقع پر گفتگو کرتے ہوئے رابطہ کمیٹی کے سینئر ڈپٹی کنوینر ندیم نصرت نے گفتگو کرتے ہوئے کہاکہ سانحہ صفورا پاکستان کی تاریخ کا ایک سیاہ باب ہے۔ سفاک دہشت گردوں نے ایک امن پسند کمیونٹی کے معصوم و بے گناہ عورتوں ،بچوں، نوجوانوں اوربزرگوں کوجس طرح سفاکی سے گولیوں کا نشانہ بنایا، جس طرح ان معصوموں کے خون سے ہولی کھیلی ہے وہ وحشت وبربریت کی بدترین مثال ہے۔ انہوں نے سانحہ پر اسماعیلی کمیونٹی سے مکمل یکجہتی کا اظہار کیا اور مطالبہ کیا کہ دہشت گردی اوربربریت کے واقعہ میں ملوث سفاک دہشت گردوں کو گرفتار کیا جائے۔