ایم کیوایم کے تحت اسماعیلی برادری سے اظہاریکجہتی کیلئے آج بعدنماز مغرب تعزیتی اجتماعات منعقد ہوں گے

کراچی ۔۔۔14،مئی2015ء

متحدہ قومی موومنٹ کے تحت آج بروز جمعرات بعدنماز مغرب جناح گراؤنڈ عزیزآبادکراچی سمیت ملک بھر میں صفورا چورنگی کے سانحہ میں جاں بحق ہونے والے افراد کی یاد میں(Candle Vigil) شمعیں روشن کی جائیں گی اورانہیں خراج عقیدت پیش کرنے کیلئے ایک منٹ کی خاموشی اختیار کی جائے گی ۔ تفصیلات کے مطابق گزشتہ روز مسلح دہشت گردوں نے کراچی کے علاقے صفورا چورنگی کے قریب بس میں سواراسماعیلی کمیونٹی سے تعلق رکھنے والے افراد کو دہشت گردی کا نشانہ بناکر 46 افراد کو سفاکی سے قتل اور متعددافراد کو شدید زخمی کردیاتھا۔ ایم کیوایم کی جانب سے آج بروزجمعرات کو ملک بھر میں سانحہ صفوراچورنگی کے المناک واقعہ پر اسماعیلی کمیونٹی سے اظہار یکجہتی کیلئے کراچی سمیت صوبہ سندھ، پنجاب، خیبرپختونخوا، بلوچستان ، آزادکشمیر اور گلگت بلتستان میں یوم سوگ منانے اورتعزیتی اجتماعات منعقد کرنے کا اعلان کیاتھا ۔ اس سلسلے میں آج ایم کیوایم کے مرکز جناح گراؤنڈ عزیزآباد میں سانحہ صفورا چورنگی میں جاں بحق ہونے والے افراد کی یاد میں (Candle Vigil)شمعیں روشن کی جائیں گی اور انہیں خراج عقیدت پیش کرنے کیلئے ایک منٹ کی خاموشی اختیار کی جائے گی ۔تعزیتی اجتماعات میں ایم کیوایم کی رابطہ کمیٹی ، منتخب ارکان سینیٹ، قومی وصوبائی اسمبلی ، ایم کیوایم کے مختلف شعبہ جات کے ارکان، مختلف زونوں، سیکٹروں اور یونٹوں کے ذمہ داران ، کارکنان اور ہمدرد عوام شرکت کریں گے ۔