ایم کیوایم کے قائد الطاف حسین کی جانب سے پاکستان مسلم لیگ ن کے سربراہ میاں نوازشریف کے خطاب کاخیرمقدم

لندن ۔۔۔ 20 مئی 2013ء

متحدہ قومی موومنٹ کے قائدجناب الطاف حسین نے الحمراء ہال لاہورمیں مسلم لیگ ن کے کارکنوں اور منتخب نمائندوں کے اجتماع سے پاکستان مسلم لیگ ن کے سربراہ میاں محمدنوازشریف کے خطاب کاخیرمقدم کرتے ہوئے کہاہے کہ میاں نوازشریف کاخطاب انتہائی متعدل اورمتوازن تھااورمیں خلوص دل سے اس کاخیرمقدم کرتاہوں۔ جناب الطا ف حسین نے کہاکہ میں دعاگوہوں کہ ملک کی ترقی اورملکی مسائل کے حل کیلئے میاں نوازشریف نے جن نیک خیالات اورعزم کااظہارکیاہے اللہ تعالیٰ انہیں اسے پوراکرنے کی توفیق عطافرمائے۔جناب الطاف حسین نے مسلم لیگ ن ، اس کے سربراہ میاں نوازشریف اوران کے تمام رہنماؤں اور کارکنوں کوانتخابات میں 2013ء میں شاندارکامیابی پر ایک مرتبہ پھرمبارکبادپیش کی اورکہاکہ ’’ جیو اورجینے دو‘‘ ایک دوسرے کے مینڈیٹ کوخلوص دل سے تسلیم کرنے اورہرکڑے وقت میں ملک کومسائل کی دلدل سے نکالنے کیلئے ایک دوسرے کے ساتھ تعاون کرنے ہی میں ملک کی سلامتی اورخوشحالی مضمرہے۔جناب الطا ف حسین نے دعاکی کہ اللہ تعالیٰ ہم سب کوہرکڑی آزمائش ، مشکل اورکٹھن حالات سے نمٹنے کاحوصلہ ، ہمت اورتوفیق عطافرمائے۔