مسلح دہشت گردوں کی فائرنگ سے ایم کیوایم میڈیکل ایڈ کمیٹی عباسی شہید اسپتال یونٹ کے کارکن دانش کلیم کے بہیمانہ قتل پر رابطہ کمیٹی کااظہار مذمت

کراچی ۔۔۔19، فروری 2015ء 

متحدہ قومی موومنٹ کی رابطہ کمیٹی نے اورنگی ٹاؤن میں مسلح دہشت گردوں کی فائرنگ سے ایم کیوایم میڈیکل ایڈ کمیٹی عباسی شہید اسپتال یونٹ کے کارکن دانش کلیم ولد کلیم اللہ کلیم شیخ کے بہیمانہ قتل کی سخت ترین الفاظ میں مذمت کی ہے اور سفاکانہ قتل کی اس واردات کو شہر کا امن غارت کرنے کی گھناؤنی سازشوں کا تسلسل قرار دیا ہے ۔ ایک بیان میں رابطہ کمیٹی نے کہاکہ صرف رواں سال 2015ء جنوری کے مہینے میں ایم کیوایم کے17کارکنان جبکہ فروری میں مہینے میں دانش کلیم کو فائرنگ کرکے مسلح دہشت گرد بیدردی سے شہید کرچکے ہیں اورسفاکانہ قتل میں ملوث سفاک دہشت گرد قانون نافذ کرنے والے اداروں کے نظروں سے اوجھل ہیں ۔ رابطہ کمیٹی نے کہا کہ ایک جانب شہر میں ایم کیوایم کے ذمہ داران و کارکنان کو قانون نافذ کرنے والے ادارے غیرقانونی چھاپہ مار کارروائیوں کے دوران بلاجواز حراست میں لے کر انسانیت سوز تشدد کا نشانہ بنا رہے ہیں جبکہ دوسری جانب مسلح دہشت گرد قانون نافذ کرنے والے اداروں کی گرفت سے نہ صرف محفوظ ہیں بلکہ وہ کھلے عام ایم کیوایم کے کارکنان ، تاجروں ،علمائے کرام اور ہر شعبہ ہائے زندگی کے افراد کوقتل و غارتگری کا نشانہ بنا رہے ہیں جس کی جتنی بھی مذمت کی جائے کم ہے ۔ رابطہ کمیٹی نے کہاکہ ایم کیوایم نے ملک میں جاری دہشت گردی کے خلاف جنگ کو اہمیت دیکر اسے عملی طور پر ترجیح دی ہوئی ہے ،دہشت گردی کے خلاف جاری جنگ میں ہر سطح پر نہ صرف کردار ادا کیا ہے بلکہ ساتھ دیا ہے اور اس کا صلہ ایم کیوایم کو دہشت گردی کا نشانہ بنا کر دیاجارہا ہے ۔رابطہ کمیٹی نے کہاکہ شہر میں ایم کیوایم کے ذمہ داران و کارکنان کو قتل و غارتگری کا مسلسل نشانہ بنانا اور قاتلوں کا آزاد گھومنا ہر محب وطن ، قانون اورجمہوریت پسند افراد کیلئے لمحہ فکریہ ہے ۔ رابطہ کمیٹی نے دانش کلیم شہید کے تمام سوگوار لواحقین سے دلی تعزیت وہمدردی کااظہا رکرتے ہوئے انہیں صبر کی تلقین کی اور دعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے۔رابطہ کمیٹی نے وزیراعظم نواز شریف ، وفاقی وزیر داخلہ چوہدری نثار علی خان ، گورنر سندھ ڈاکٹر عشرت العباد اور وزیر اعلیٰ سندھ سید قائم علی شاہ سے مطالبہ کیا کہ ایم کیوایم میڈیکل ایڈ کمیٹی عباسی شہید اسپتال یونٹ کے کارکن دانش کلیم کے سفاکانہ قتل میں ملوث دہشت گردوں کو فی الفور گرفتار کیاجائے اور شہر ایم کیوایم کے ذمہ داران و کارکنان کے قتل کی مسلسل وارداتوں کا سلسلہ بند کرایاجائے ۔ 
English Viewers