شاہ فیصل کالونی کے علاقے گرین ٹاؤن میں آصف بوائزاسکول اوراختر گرلز سیکنڈری اسکول پر قبضہ مافیاکی جانب سے قبضہ کرنے اور اسے مسمار کرنے پر ایم کیوایم کے قائدالطاف حسین کا شدیداظہارمذمت

لندن۔۔۔ 12 جنوری 2015ء

متحدہ قومی موومنٹ کے قائدالطاف حسین نے شاہ فیصل کالونی کے علاقے گرین ٹاؤن میں قائم آصف بوائزاسکول اوراختر گرلز سیکنڈری اسکول پر قبضہ مافیاکی جانب سے قبضہ کرنے اور اسے مسمارکرکے کھنڈرمیں تبدیل کرنے کی شدیدمذمت کی ہے۔اپنے ایک بیان میں انہوں نے کہاکہ مجھے ایک نجی ٹی وی پر یہ دیکھ کرانتہائی دلی صدمہ پہنچاکہ اسکولوں کی معصوم بچیاں کھنڈرپربیٹھ کرتعلیم حاصل کرنے پر مجبورہیں۔انہوں نے کہاکہ اسکولوں کومسمارکئے جانے پرمعصوم بچیوں کے بہتے ہوئے آنسوقہرخداوندی کودعوت دے رہے ہیں۔ جناب الطاف حسین نے گورنرسندھ ڈاکٹر عشرت العبادسے مطالبہ کیاہے کہ شاہ فیصل کالونی میں قائم آصف بوائزاسکول اوراختر گرلز سیکنڈری اسکول پر قبضہ مافیاکی جانب سے قبضہ اورتوڑے جانے کاہنگامی بنیادپر نوٹس لیں اورقبضہ مافیاکے جن عناصرنے ان اسکولوں پر قبضہ کرکے اسے ملبہ کاڈھیربنایاہے انہیں فی الفورگرفتارکیاجائے خواہ وہ قبضہ مافیاکے عناصرکتنے ہی بااثرکیوں نہ ہوں۔ اگر اس میں ایم کیوایم کابھی کوئی فردیاافراد ملوث ہوں توان کے ساتھ بھی کسی قسم کی کوئی رعایت نہ کی جائے اورانہیں گرفتارکرکے قانون کے مطابق سخت سے سخت سزادی جائے ۔ جناب الطاف حسین نے اسکولوں پرقبضہ کی خبرکانوٹس لیتے ہوئے فوری طورپر گورنر سندھ ڈاکٹر عشرت العبادسے رابطہ کیااور مطالبہ کیاکہ دونوں اسکولوں کی تعمیر کافی الفورآغازکیاجائے اوراسکولوں کی تعمیرمکمل ہونے تک دونوں اسکولوں میں زیرتعلیم بچیوں کی تعلیم کافی الفورکوئی متبادل انتظام کیاجائے ۔انہوں نے مزیدکہاکہ اگرگورنرسندھ ڈاکٹرعشر ت العبادکچھ نہیں کرسکتے توفی الفورگورنرشپ سے استعفیٰ دیدیں ۔جناب الطاف حسین نے آصف بوائزاسکول اوراختر گرلز سیکنڈری اسکول کی انتظامیہ، اساتذہ اوراسکول کے بچوں بچیوں سے دلی ہمدردی کااظہارکیااورکہاکہ میں آپ کے دکھ اورغم میں برابرکاشریک ہوں اورآپ کویقین دلاتاہوں کہ اسکولوں پرقبضہ ختم کرانے اوراس کی دوبارہ تعمیرہونے تک چین سے نہیں بیٹھوں گا۔ 
English Viewers
ویڈیو