سائٹ میں فیکٹری میں لگنے والی آگ اوراس سے بڑے پیمانے پر ہونے والے نقصانات پرایم کیوایم کےقائدالطاف حسین کا گہرے افسوس کااظہار

لندن۔۔۔ 6 دسمبر 2014ء

متحدہ قومی موومنٹ کے قائدجناب الطاف حسین نے سائٹ کے علاقے میں فیکٹری میں لگنے والی آگ اوراس سے بڑے پیمانے پر ہونے والے نقصانات پر گہرے افسوس کااظہارکیاہے ۔ اپنے بیان میں جناب الطاف حسین نے کہاکہ سائٹ کی اس فیکٹری میں لگنے والی آگ کوکئی گھنٹے گزرچکے ہیں لیکن تاحال اس آگ پر قابونہیں پایاجاسکاہے۔جناب الطاف حسین نے پاکستان نیوی اوردیگرعسکری اداروں کے حکام سے اپیل کی ہے کہ وہ اپنے ماہرین کوہدایت کریں کہ وہ آگ بجھانے کیلئے مطلوبہ جدیدسائنٹفک آلات لیکرفوری طورپرآگ سے متاثرہ فیکٹر ی پہنچیں،آگ بجھانے کیلئے اپنی خدمات پیش کریں اور اس ہولناک آگ پرقابوپانے کیلئے فائربریگیڈاور امدادی ٹیموں کی مددکریں ۔ انہوں نے کہاکہ اگراس سلسلے میں فوری کارروائی نہیں کی گئی توکہیں ایسانہ ہوکہ فیکٹری میں بھڑکنے والی یہ آگ دیگرفیکٹریوں اورعلاقوں کواپنی لپیٹ میں لے لے۔جناب الطا ف حسین نے سندھ کے گورنرڈاکٹرعشرت العباد اور وزیراعلیٰ سندھ سیدقائم علی شاہ سے کہاکہ وہ اس ہولناک آگ بجھانے کے سلسلے میں کی جانے والی کارروائی کی مسلسل مانیٹرنگ کریں۔ انہوں نے ہولناک آگ پر قابوپانے کیلئے کئی گھنٹوں سے جرات وہمت کے ساتھ نبردآزمافائربریگیڈ کے عملے کو زبردست خراج تحسین پیش کیااوراس دوران جھلسنے والے فائر فائٹرزکی صحتیابی کیلئے دعاکی۔ جناب الطاف حسین نے مطالبہ کیاکہ فائربریگیڈکواس قسم کی صورتحال سے نمٹنے کیلئے جدیدفائرٹینڈرزاورجدیدآلات سے لیس کیاجائے ۔
English Viewers