بلاول زرداری کے دھمکی آمیز بیان پر اس کا تحفظ کرنے والے پیپلزپارٹی کے عاقبت نااندیش رہنما ؤں کے ہوتے ہوئے پیپلزپارٹی کو کسی دشمن کی ضرورت نہیں ہے ، رکن رابطہ کمیٹی عامر خان

کراچی ۔۔۔3، دسمبر2014ء 

متحدہ قومی موومنٹ کی رابطہ کمیٹی کے رکن عامر خان نے کہا ہے کہ کروڑوں عوام کے ہر دلعزیز رہبر وہنما جناب الطاف حسین کے خلاف بلاول زرداری کا دھمکی آمیز بیان سیاسی ناپختگی کا ثبوت ہے اور اس سیاسی ناپختگی پر بلاول زرداری کو صحیح راہ دکھانے کے بجائے اس کا تحفظ کرنے والے پیپلزپارٹی کے عاقبت نااندیش رہنما ؤں کے ہوتے ہوئے پیپلزپارٹی کو کسی دشمن کی ضرورت نہیں ہے ۔ایک بیان میں انہوں نے کہا کہ6اکتوبر 2014ء کو بلاول ہاؤس میں بلاول زرداری نے جناب الطاف حسین کے خلاف جو دھمکی آمیز زبان استعمال کی ہے وہ ان کے والد آصف علی زرداری کی مفاہمانہ پالیسی سے متصادم ہے جس کا پیپلزپارٹی کے مخلص رہنماؤں اور کارکنوں کو فی الفور نوٹس لینا چاہئے ۔ انہوں نے کہا کہ بلاول زرداری کے دھمکی آمیز بیان سے جناب الطاف حسین کے کروڑوں چاہنے والے عوام کی دل آزاری ہوئی ہے اور اس دل آزاری پر پیپلزپارٹی کے رہنما ء اختلافی بیانات دیکر دراصل بلاول زرداری کی سیاسی ناپختگی سے فائدہ اٹھا رہے ہیں۔ انہو ں نے کہا کہ سیاسی بالغ نظری کا مظاہرہ یہی ہوتا ہے کہ اپنی غلطی پر شرمند ہوا جائے اور اس پر معافی مانگ لی جائے اور اگر بلاول زرداری نے جناب الطاف حسین کے خلاف دھمکی آمیز بیان واپس نہ لیا اور معافی نہ مانگی تو جناب الطاف حسین کے کروڑوں چاہنے والے عوام بلاول زرداری کو سیاسی ناپختگی کے باعث پیپلز پارٹی کی چیئرمین شپ کیلئے ناہل قرار دینے کے حق دار ہوں گے ۔ عامر خان نے کہا کہ اب وقت آگیا ہے کہ پیپلزپارٹی کو ایسے رہنماؤں سے چھٹکارا حاصل کرنا چاہئے جو شہید ذو الفقار علی بھٹو اور شہید محترمہ بے نظیر بھٹو کے مشن کو نقصان پہنچا رہے ہیں اور پیپلزپارٹی کو ایسے دوراہے پر لے جانا چاہتے ہیں جہاں پیپلزپارٹی کا انجام سیاسی موت ہوگا ۔
English Viewers Click Here