معذور افراد سے اپنائیت ، محبت اور شفقت کا عمل سب لوگوں کی اخلاقی ذمہ داری ہے، الطاف حسین

لندن۔۔۔3، دسمبر2014ء

متحدہ قومی موومنٹ کے قائد جناب الطاف حسین نے کہا ہے کہ ذہنی و جسمانی معذور افراد معاشرے کی خصوصی توجہ کے مستحق ہوتے ہیں اور آج کے جدید اور باشعور دور میں بھی انہیں بوجھ سمجھنے کی ذہنیت رکھنے والے افراد خود ذہنی پستی اور معذوری کا شکار ہیں اور اپنی اخلاقی ذمہ داریوں سے مکمل طور پر غافل ہیں ۔معذور افراد کے عالمی دن کے موقع اپنے خصوصی بیان میں انہوں نے کہاکہ معذور افراد سے اپنائیت ، محبت اور شفقت کا عمل سب لوگوں کی اخلاقی ذمہ داری ہے اور جو لوگ معذو رافراد کا سہارا بنے ہوئے ہیں اور انہیں معاشرے کا مفید فرد بنانے کیلئے انتھک جدوجہد کررہے ہیں وہ نیک اور عظیم کام سرانجام دے رہے ہیں اور ایسے تمام عظیم افراد کو میں زبردست خراج تحسین پیش کرتا ہوں ۔انہوں نے کہاکہ ایم کیوایم معذور افراد کو معاشرے کیلئے مفید اور کار آمد بنانے کیلئے ہرممکن کردار ادا کررہی ہے اور ان کے بنیادی حقوق کیلئے ہر سطح پر آواز بلند کررہی ہے ۔ انہوں نے مزید کہاکہ پاکستان میں ہر سال معذور افراد کا عالمی دن منایا جاتا ہے لیکن اس کے باوجود معذور افراد حکومت کی خصوصی سرپرستی اور خصوصی اداروں کے قیام سے محروم ہیں اور معذور افراد کی یہ محرومی پاکستانی معاشرے کی خرابی اور بے حسی ہے جس کی جتنی بھی مذمت کی جائے کم ہے ۔جناب الطاف حسین نے وزیراعظم نواز شریف سے مطالبہ کیا کہ معذور افراد کیلئے قوانین پر عمل درآمد کو یقینی بنایاجائے اور اس سلسلے میں فی الفور قانون سازی کرکے معذور افراد کو بنیادی حقوق مہیا کئے جائیں ۔
English Viewers Click Here
وڈیو دیکھیں