عوام ملک کے فرسودہ نظام میں حقیقی معنوں میں تبدیلی کیلئے زیادہ سے زیادہ تعداد میں ایم کیوایم کے ممبربنیں۔الطاف حسین

لندن۔۔۔14 نومبر2014ء

متحدہ قومی موومنٹ کے قائدجناب الطاف حسین نے آج شروع ہونے والی ممبرسازی مہم میں ممبرشپ فارم بھرکرایم کیوایم میں شامل ہونے والے نوجوانوں، بزرگوں اورماؤں بہنوں کوخوش آمدیدکہاہے اور عوام سے اپیل کی ہے کہ وہ ملک کے فرسودہ نظام میں حقیقی معنوں میں تبدیلی کیلئے ایم کیوایم کی ممبرسازی مہم میں بڑھ چڑھ کرحصہ لیں اور زیادہ سے زیادہ تعدادمیں ایم کیوایم کے ممبربنیں۔ انہوں نے یہ اپیل آج ایم کیو ایم کے مرکزنائن زیروپر رابطہ کمیٹی سے فون پر گفتگوکرتے ہوئے کہی۔ جناب الطاف حسین نے کہاکہ ایم کیوایم غریبوں اورمتوسط طبقہ کی قیادت کی زبانی بات نہیں کرتی بلکہ اس نے 26سال قبل غریب اورمتوسط طبقہ سے تعلق رکھنے والے نوجوانوں کوبلدیات اور قومی وصوبائی اسمبلی میں بھیج کر ملک کی سیاسی تاریخ میں انقلاب برپاکیا۔ ایم کیوایم پورے ملک میں غریب ومتوسط طبقہ کے اس پرامن انقلاب کیلئے جدوجہدکررہی ہے تاکہ غریب اورمحروم طبقہ کومعاشرے میں اس کاجائزمقام دلایاجائے ۔ جناب الطاف حسین نے کہاکہ ممبرسازی کی مہم ملک کے تمام غریب ومتوسط طبقہ کے عوام خصوصاً نوجوانوں کیلئے ایک دعوت ہے کہ وہ آئیں اورملک کے فرسودہ نظام میں حقیقی معنوں میں تبدیلی کیلئے ایم کیوایم کے ممبربنکراس قافلے کاحصہ بنیں۔ انہوں نے کہاکہ ایم کیو ایم کے کارکنان کی بڑی تعداد ایک طرف تھرکے مختلف علاقوں میں امدادی کیمپوں میں امدادی سرگرمیوں میں رات دن مصروف ہے اور دوسری جانب ممبرسازی مہم شروع کردی گئی ہے لہٰذا میں عوام سے اپیل کرتاہوں کہ وہ آگے بڑھیں اورایم کیوایم کے کیمپوں پر جاکر ممبرشپ فارم بھرکر اس قافلے کاحصہ بنیں۔ جناب الطاف حسین نے بھرپوراندازمیں ممبرسازی مہم شروع کرنے پر کراچی سمیت سندھ کے تمام یونٹوں ،سیکٹروں اور زونوں اورپنجاب، بلوچستان، خیبرپختونخوا، گلگت بلتستان اورآزادکشمیرکے تمام اضلاع کے عہدیداروں ، کارکنوں، ماؤں بہنوں اور بزرگوں کوزبردست خراج تحسین پیش کیا۔انہوں نے رابطہ کمیٹی، تمام حق پرست سینیٹرز، ارکان قومی وصوبائی اسمبلی اورتمام شعبہ جات کے ذمہ داروں کوبھی شاباش پیش کی ۔ 
English Translation